«TAJIKISTAN FASHION WEEK». Тарроҳони машҳур ба дӯстдорони олами мӯд коллексияҳои нав пешниҳод намуданд
ДУШАНБЕ, 21.10.2024 /АМИТ «Ховар»/. Дар мавсими сенздаҳуми Ҳафтаи мӯди Тоҷикистон- «Tajikistan Fashion Week», ки 20-21 октябр дар Душанбе баргузор гардид, 15 тарроҳ ва брендҳои машҳур аз Тоҷикистон, Русия, Қазоқистон, Узбекистон, Гурҷистон ва Озарбойҷон коллексияҳои навро пешниҳоди дӯстодорони дунёи мӯд намуданд. Ин намоиши муҳими фарҳангӣ бо ташаббуси Иттиҳодияи эҷодии «T&Z» ва дастгирии Вазорати саноат ва технологияҳои нави Ҷумҳурии Тоҷикистон дар доираи Солҳои рушди саноат (2022-2026) ташкил карда шуд.
«Ҳафтаи мӯди Тоҷикистон» — ягона майдоне аст, ки алоқамандону дӯстдорон ва тарроҳони соҳаи мӯдро ҷамъ меорад ва 8 сол мешавад, ки дар пойтахти мамлакат- шаҳри Душанбе доир мегардад.
Тавре намояндаи масъули Вазорати саноат ва технологияҳои нави Ҷумҳурии Тоҷикистон Малика Ёрбобоева дар суҳбат ба хабарнигори АМИТ «Ховар» гуфт, «баргузории Ҳафтаи мӯди Тоҷикистон дар шаҳри Душанбе дар ташаккул ва муаррифии тарҳҳои нави тарроҳони кишварҳои дунё, ки дар Ҳафтаи мӯди Тоҷикистон иштирок намуданд, саҳми муносиб мегузорад. Ин намоиши фарҳангӣ ҳамзамон ба тақвияти ҳамкорӣ байни тарроҳони давлатҳои ҷаҳон, аз ҷумла Тоҷикистон, ҷалби меҳмонону сайёҳони хориҷӣ ва дар маҷмуъ, муаррифии Тоҷикистон ҳамчун мамлакати фарҳангӣ мусоидат менамояд».
«Дар фасли 12-уми Ҳафтаи мӯди Тоҷикистон мо ба тарроҳон пешниҳод намудем, ки коллексияҳои худро пурра бо истифода аз нақшу нигор ва унсурҳои миллӣ омода намоянд ва ҳамин гуна ҳам шуд»,-афзуд намояндаи масъули Вазорати саноат ва технологияҳои нави Ҷумҳурии Тоҷикистон.
Дар Ҳафтаи мӯди Тоҷикистон 8 тарроҳ аз Тоҷикистон коллексияи навро пешниҳоди тамошобинон гардониданд. Бештари либосҳои тарроҳони тоҷик аз матои шинаму зебои атлас ва адрас, ки истеҳсоли Корхонаи саноатии «Атласи Хуҷанд» мебошад, омода шуда буд. Дар доираи Ҳафтаи мӯди Тоҷикистон инчунин намоиш-фурӯши либос доир шуд, ки дар тарғиби фарҳангӣ миллӣ, хусусан муаррифии пироҳанҳои шинаму зебои аз атлас ва адрас омодагардида нақши муассир гузошт. Либосҳои дар Ҳафтаи мӯди Тоҷикистон ба намоишгузошта барои фаслҳои баҳор ва тобистони соли 2025 пешнибинӣ гардидаанд.
Баргузории Ҳафтаи мӯди Тоҷикистон дар Душанбе имкон дод, ки ҳунару маҳорат ва малакаи зебоиофарии тарроҳон дар саҳна ба таври густурда муаррифӣ гардад. Дар доираи Ҳафтаи мӯди Тоҷикистон инчунин мулоқоти тарроҳон доир гардида, масъалаҳои марбут ба густариши ҳамкорӣ матраҳ шуданд.
Фасли сенздаҳуми Ҳафтаи мӯди Тоҷикистон- «Tajikistan Fashion Week» дар самти таҳкими равобити фарҳангию дӯстӣ байни тарроҳони давлатҳои хориҷӣ, тавсеа додани ҳунарҳои мардумӣ ва баланд бардоштани ҳисси зебоипарастӣ қадами устувор аст.
Марзия САИДЗОДА,
АМИТ «Ховар»
АКС: АМИТ «Ховар»
Дар Бохтар аввалин Созишнома оид ба рушди инфрасохтори соҳаи варзиш ба имзо расид
Намояндагони Тоҷикистон дар Озмуни байналмилалии «Кашфи олами моликияти зеҳнӣ» ғолиб гардиданд
«ЧОРАҲОИ ПЕШГИРИИ ЗУҲУРОТИ КОРРУПСИОНӢ ДАР СОҲАИ НАҚЛИЁТ». Дар ин мавзуъ конференсияи ҷумҳуриявӣ доир шуд
«Сомон Эйр» барои харидории ду ҳавопаймои Boeing 737-8 бо ширкати «DAE Capital» -и Амрико созишнома ба имзо расонд
Ҳамкории Тоҷикистон ва Созмони Милали Муттаҳид барои мусоидат ба маблағгузории ҳадафҳои стратегӣ баррасӣ гардид
НИШАСТИ МАТБУОТӢ. Дар Тоҷикистон беш аз 22,4 миллиард кВт-соат неруи барқ ва зиёда аз 1,3 миллион Гкал неруи гармӣ истеҳсол шудааст
Соли 2024 дар 3239 гектар корҳои бунёд ва барқароркунии ҷангал иҷро гардид
Соли 2024 аз Тоҷикистон ба беш аз 26 давлати хориҷӣ маҳсулоти кишоварзӣ содирот гардид
«Тоҷикаэронавигатсия» соли 2024 ба 71 ҳазору 459 техникаи ҳавопаймоӣ хизмат расонидааст
НИШАСТИ МАТБУОТӢ. Дар Тоҷикистон панҷ барномаи давлатӣ барои беҳтар намудани заминҳои кишоварзӣ амал менамояд
НИШАСТИ МАТБУОТӢ. Бахшида ба Соли байналмилалии ҳифзи пиряхҳо лоиҳаи Консепсияи «Харитаи роҳ» таҳия гардид
СОЛҲОИ РУШДИ ИҚТИСОДИ РАҚАМӢ ВА ИННОВАТСИЯ. Хадамоти алоқа дар доираи ин солҳо иҷрои кадом корҳоро ба нақша гирифтааст?
