Ба ифтихори 30-солагии қабули Конститутсияи Тоҷикистон дар Теҳрон ҳамоиш баргузор гардид

ДУШАНБЕ, 08.11.2024 /АМИТ «Ховар»/. 7 ноябр дар Сафорати Ҷумҳурии Тоҷикистон дар Эрон ба ифтихори 30-солагии Рӯзи Конститутсияи Ҷумҳурии Тоҷикистон бо иштироки ҳамватанони муқим, донишҷӯён ва таҷрибаомӯзони тоҷики донишгоҳҳои тиббии Теҳрон ҳамоиш баргузор гардид. Дар ин хусус АМИТ «Ховар» бо истинод ба Сафорати Ҷумҳурии Тоҷикистон дар Эрон хабар медиҳад.

Сафири Ҷумҳурии Тоҷикистон дар Эрон Низомиддин Зоҳидӣ, аҳаммияти Конститутсияро ҳамчун санади сарнавиштсоз дар инкишофи давлатдории навини тоҷикон ва заҳмату талошҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро дар рушди устувор ва дастовардҳои азими мамлакат дар заминаи татбиқи самараноки муқаррароти Конститутсияи Тоҷикистон таъкид намуд.

Дар идомаи ҳамоиш дипломатҳои Сафорат дар мавзуъҳои «Конститутсияи Тоҷикистон — сарчашмаи татбиқи сиёсати хориҷаи мамлакат» ва «Конститутсия ва ташаккули низоми хизмати дипломатии Тоҷикистон» маъруза карданд.

АКС: Сафорати Ҷумҳурии Тоҷикистон дар Эрон