Донишгоҳи байналмилалии сайёҳӣ ва соҳибкории Тоҷикистон ва Донишгоҳи Чиндао Бинҳайи Чин Созишномаи ҳамкорӣ ба имзо расониданд

ДУШАНБЕ, 24.11.2024 /АМИТ «Ховар»/. Намояндагони Донишгоҳи байналмилалии сайёҳӣ ва соҳибкории Тоҷикистон дар доираи сафари корӣ ба Ҷумҳурии Мардумии Чин бо роҳбарияти Донишгоҳи Чиндао Бинҳай вохӯрӣ намуданд.

Тавре АМИТ «Ховар» бо истинод ба Донишгоҳи байналмилалии сайёҳӣ ва соҳибкории Тоҷикистон хабар медиҳад, зимни мулоқот масоили мубрами ҳамкории ҷонибҳо дар самти ташкили табодули академии донишҷӯён, такмили ихтисоси омӯзгорон, даъвати профессорони ҷонибҳо, амалисозии таҳқиқоти илмӣ ва чорабиниҳои илмии муштарак, ташкили таҷрибаомӯзӣ ва лагерҳои зимистонаву тобистона мавриди баррасӣ қарор дода шуд.

Ҷонибҳо ба мувофиқа расиданд, ки ҳамкорӣ доир ба ин самтҳо дар доираи созишномаи ҳамкорӣ амалӣ карда мешавад.

Дар баробари ин масъалаи таъсиси «Институти Бан-Мо» байни ҷонибҳо муҳокима шуда, ҳамкорӣ дар ин самт дар доираи санадҳои меъёрии ҳуқуқии ҷонибҳо ва дар мувофиқа бо мақоми ваколатдори соҳа амалӣ мегардад.

АКС: Донишгоҳи байналмилалии сайёҳӣ ва соҳибкории Тоҷикистон