35-СОЛАГИИ ИСТИҚЛОЛИ ДАВЛАТӢ. Дар ноҳияи Рӯдакӣ 12 коргоҳу корхонаи саноатӣ ба истифода дода шуд

РӮДАКӢ, 17.12.2024 /АМИТ «Ховар»/. Ба ифтихори 35-солагии Истиқлоли давлатии Ҷумҳурии Тоҷикистон дар ноҳияи Рӯдакӣ 369 иншооти гуногун бунёду навсозӣ мегардад. Мувофиқи ҳисоботи оморӣ, аз 369 иншооти нақшавӣ 55 иншоот ба соҳаи маориф, 7 иншоот ба соҳаи фарҳанг, 56 иншоот ба соҳаи тандурустӣ, 19 иншоот ба соҳаи варзиш, 86 иншоот ба соҳаи коммуникатсия ва хизматрасонӣ рост меояд. Ҳамзамон дар ин давра 15 корхонаи саноатӣ, марказҳои савдою хизматрасонӣ, биноҳои баландошёна, кошонаи ҳусн, сартарошхона, ҳаммом, фермаҳои чорво ва парандапарварӣ бунёд ва навсозӣ карда мешаванд.

Тавре ба мухбири минтақавии АМИТ «Ховар» Субҳониддини Маҳмуд муовини Раиси ноҳияи Рӯдакӣ Бахтиёр Рустамзода иттилоъ дод, то якуми декабри соли равон 203 иншооти гуногун мавриди истифода қарор дода шуданд. Инҳо 12 коргоҳу корхонаи истеҳсолӣ, 1 гармхона, 11 чоҳи амудӣ, 9 толору майдончаи варзишӣ, 25 маркази саломатию бунгоҳи тиббӣ, як сартарошхона, 33 маркази савдою хизматрасонӣ, биноҳои баландошёна, 5 китобхона, боғи фарҳангӣ ва 55 муассисаи таълимию синфхонаҳои иловагӣ ва биноҳои иловагӣ дар назди муассисаҳои таълимӣ мебошанд.

Бунёди иншооти ҷашнӣ ба ифтихори 35-солагии Истиқлоли давлатӣ дар ноҳияи Рӯдакӣ идома дошта, то рӯзи ҷашни миллӣ 369 иншоот бо сифати баланд ва риояи қоидаҳои меъморӣ сохта, ба истифода дода мешаванд.

АКС: АМИТ «Ховар»