Ҳамкории Тоҷикистон бо сохтори Созмони Милали Муттаҳид оид ба масъалаҳои коҳиши офатҳои табиӣ баррасӣ шуд

ДУШАНБЕ, 21.12.2024 /АМИТ «Ховар»/. 20 декабр вохӯрии Сафири Фавқулода ва Мухтори Ҷумҳурии Тоҷикистон дар Конфедератсияи Швейтсария, Намояндаи доимии Ҷумҳурии Тоҷикистон дар назди Шуъбаи Созмони Милали Муттаҳид ва дигар созмонҳои байналмилалӣ дар Женева Шараф Шерализода бо Намояндаи махсуси  Дабири кулли Созмони Милали Муттаҳид оид ба масъалаҳои коҳиши офатҳои табиӣ, Роҳбари идораи Созмони Милали Муттаҳид оид ба коҳиш додани хатари офатҳои табиӣ (UNDRR) Камал Кишоре баргузор гардид.

Тавре АМИТ «Ховар» бо истинод ба Сафорати Ҷумҳурии Тоҷикистон дар Конфедератсияи Швейтсария хабар медиҳад, зимни мулоқот ҷонибҳо атрофи масъалаҳои тақвияти ҳамкории Тоҷикистон бо сохторҳои дахлдори Созмони Милали Муттаҳид ва дурнамои иқдомҳои муштарак дар самти коҳиши хатари офатҳои табиӣ, инчунин доир ба Конфронси дарпешистодаи байналмилалии сатҳи баланд оид ба ҳифзи пиряхҳо, ки 29-31 майи соли 2025 дар шаҳри Душанбе баргузор мегардад, мубодилаи афкор намуданд.

АКС: Сафорати Ҷумҳурии Тоҷикистон дар Конфедератсияи Швейтсария