Барои татбиқи лоиҳаи «Барномаи рушди НБО-и «Роғун», марҳилаи 1» 270 миллион доллар ҷудо гардид

ДУШАНБЕ, 21.12.2024. /АМИТ «Ховар»/. 20 декабр дар шаҳри Пекини Ҷумҳурии Мардумии Чин маросими баимзорасонии созишномаи молиявӣ байни Ҷумҳурии Тоҷикистон ва Бонки осиёии сармоягузорӣ ва инфрасохторӣ дар ҳаҷми 1 миллиарду 922 миллиону 200 ҳазор юани чинӣ баробар ба 270 миллион доллари амрикоӣ барои татбиқи лоиҳаи «Барномаи рушди НБО-и «Роғун», марҳилаи 1» баргузор гардид. Дар ин хусус АМИТ «Ховар» бо истинод ба Вазорати молияи Ҷумҳурии Тоҷикистон хабар медиҳад.

Созишномаи мазкурро Вазири молияи Ҷумҳурии Тоҷикистон Файзиддин Қаҳҳорзода ва Ноиби Президенти Бонки осиёии сармоягузорӣ ва инфрасохторӣ Константин Лимитовский ба имзо расониданд.

Ҳаҷми маблағгузорӣ, ки аз ҷониби Бонки осиёии сармоягузорӣ ва инфрасохторӣ барои сохтмони НБО «Роғун» пешниҳод мегардад, 500 миллион доллари амрикоиро ташкил дода, он дар 2 марҳила тавассути созишномаҳои алоҳида ҷудо карда мешавад.

Ҳадафи лоиҳа таҳкими истиқлолияти энергетикии Ҷумҳурии Тоҷикистон ва мусоидат ба рушди устувори иқтисодӣ буда, барои ҳаммаблағгузории Лоти 1-ум ва Лоти 3А-и НБО-и «Роғун», инчунин сохтмон ва таъмири 55 км роҳ, аз ҷумла пулҳои байни деҳаҳо равона мегардад.

АКС: Вазорати молияи Ҷумҳурии Тоҷикистон