Хонандагони муассисаҳои таълимии Хатлон дар олимпиадаҳои фаннӣ ва байналмилалӣ 987 медал ба даст оварданд

ДУШАНБЕ, 26.12.2024. /АМИТ «Ховар»/. Соли 2024 дар даври ҷумҳуриявии олимпиадаҳои фаннӣ 541 хонандаи муассисаҳои таҳсилоти миёнаи умумии вилояти Хатлон соҳиби медал гардиданд. Дар ин хусус АМИТ «Ховар» бо истинод ба Мақомотии иҷроияи ҳокимияти давлатии вилояти Хатлон хабар медиҳад.

Бо ин нишондиҳандаи баланд вилояти Хатлон дар сатҳи ҷумҳурӣ пас аз шаҳри Душанбе дар мақоми дуюм қарор гирифт. Хонандагони вилоят, аз ҷумла 14 медали тилло, 52 медали нуқра ва 475 медали биринҷӣ ба даст оварданд.

Хонандагони вилоят аз олимпиадаҳои байналмилалӣ 446 медал, аз ҷумла 54 медали тилло, 165 медали нуқра ва 227 медали биринҷӣ ба даст оварданд, ки нисбат ба соли 2023 61 медал зиёд мебошад.

Ҳамзамон дар ин сол ба 70 хонандаи аълохони муассисаҳои таълимии шаҳру ноҳияҳои вилоят, ба 60 донишҷӯи муассисаҳои таҳсилоти ибтидоӣ, миёна ва олии касбӣ ва ба 60 олими эҷодкор дар маҷмуъ 420 ҳазор сомонӣ стипендияҳои Раиси вилояти Хатлон пардохт карда шуданд.

Ба 26 хатмкунандаи муассисаҳои таҳсилоти миёнаи умумии вилоят, ки муассисаро бо аттестати аълои универсалӣ ва равиявӣ хатм намуданд, дар ҷамъ 260 ҳазор сомонӣ, ба ҳар роҳбари муассисаи таълимӣ ба маблағи 3000 сомонӣ ва ба барандагони ҷоизаҳои вилоятии «Соҳибватан», «Омӯзгори ифтихории Хатлон», «Ҷоизаи Раиси вилояти Хатлон дар соҳаи маориф» ва ғолиби «Парчами сайёри ғолиб» аз номи Раиси вилояти Хатлон қариб 200 ҳазор сомонӣ мукофотпулӣ дода шуд.

АКС аз манбаъҳои боз