Муовини Сарвазири Тоҷикистон бо Маркази касбомӯзӣ ва хизматрасонии шаҳри Бохтар шинос шуд

ДУШАНБЕ, 13.12.2024 /АМИТ «Ховар»/. Муовини Сарвазири Ҷумҳурии Тоҷикистон Дилрабо Мансурӣ бо Маркази навтаъсиси касбомӯзӣ ва хизматрасонии шаҳри Бохтар, ки дар доираи амали лоиҳаи «Беҳтарсозии малакаҳои касбӣ ва имконияти бокортаъминшавӣ» бунёд шудааст, шинос гардид, хабар медиҳад АМИТ «Ховар».

Дар марказ дар баробари омӯзиши 5 намуд касб, аз ҷумла барқчӣ, кафшергар, андовагар, челонгар-сантехник ва усто барои насб кардани панелҳои офтобӣ, ҳамчунин барои азхуд намудани забонҳои кореягӣ, англисӣ ва русӣ машғулият ташкил шудааст. Ҳар хонанда баъди хатм соҳиби ҳуҷҷати намунаи давлатӣ мегардад.

Ҳамчунин дар бино устохонаҳои кафшергарӣ, андовагарӣ ва нигаҳдории таҷҳизоти барқӣ ҷойгир карда шудаанд.

Муовини Сарвазири мамлакат аз  шунавандагони марказ омӯзиши   забонҳои хориҷӣ  ва ихтисосҳои муосирро  даъват намуд. Таъкид гардид, ки вазъи сиёсию иқтисодии ҷаҳони муосир ва бо суръати кайҳонӣ пеш рафтани илмҳо тақозо дорад, ки ҳар шахс бояд соҳиби малака ва ҳунар бошад.

Касбомӯзон миннатдории самимии хешро ба Президенти Тоҷикистон барои фароҳам овардани шароити мусоиди омӯзиши забонҳои хориҷӣ ва касбу ҳунар баён доштанд.

АКС аз манбаъҳои боз