Дар Душанбе Форуми олимону пажуҳишгарони Тоҷикистон ва Эрон баргузор шуд

Январь 15, 2025 16:30

ДУШАНБЕ, 15.01.2025 /АМИТ «Ховар»/. Имрӯз дар ҳошияи сафари давлатии Президенти Ҷумҳурии Исломии Эрон Масъуд Пизишкиён ба Ҷумҳурии Тоҷикистон дар Академияи миллии илмҳои Тоҷикистон Форуми олимону пажуҳишгарони Ҷумҳурии Тоҷикистон ва Ҷумҳурии Исломии Эрон баргузор шуд, хабар медиҳад мухбири АМИТ «Ховар».

Бояд гуфт, ки ҳадаф аз баргузор намудани форум таҳкими минбаъдаи ҳамкории бисёрҷониба ва дуҷонибаи байнидавлатӣ дар соҳаи илму фановарӣ, муттаҳид намудани неруи илмии олимони Ҷумҳурии Тоҷикистон ва Ҷумҳурии Исломии Эрон, инчунин баррасии масъалаҳои ҳамоҳангсозии таҳқиқоти илмӣ дар доираи як барнома мебошад.

Пеш аз оғози форум олимону  пажуҳишгарони Эрон бо намоиши дастовардҳои олимону пажуҳишгарони муассисаҳои илмӣ-таҳқиқотии Академияи миллии илмҳои Тоҷикистон шинос шуда, ба дастовардҳои олимону муҳаққиқон баҳои баланд доданд.

Бояд гуфт, ки муассисаҳои илмӣ-таҳқиқотии Академияи миллии илмҳои Тоҷикистон давоми солҳои соҳибистиқлолии ҷумҳурӣ дар пешбурди корҳои илмию таҳқиқотӣ саҳми назаррас гузошта, дар самтҳои гуногун соҳиби дастовардҳои арзишманд гардидаанд. Натиҷаи ҳама ин дастовардҳо маҳз таваҷҷуҳи Президенти Тоҷикистон муҳтарам Эмомалӣ Раҳмон аст, ки барои олимону пажуҳишгарон тамоми шароиту имконияти мавҷударо фароҳам овардаанд.

Сипас кори форум оғоз гардида, дар он президенти Академияи миллии илмҳои Тоҷикистон Қобилҷон Хушвахтзода таъкид намуд, ки солҳои охир густаришу таҳкими робитаҳои дӯстӣ ва ҳамкории гуногунҷанба байни Ҷумҳурии Тоҷикистон ва Ҷумҳурии Исломии Эрон тақвият ёфт. Ҳамкории гуногунҷанба бо ин ҷумҳурии дӯсту ҳамзабон аз сиёсати дӯстонаи роҳбарони ду мамлакат сарчашма мегирад.

Дар доираи ин ҳамкорӣ олимону пажуҳишҳгарони ду давлати ҳамзабон пайваста дар якҷоягӣ таҳқиқоти илмӣ гузаронида, таъриху фарҳанги бою ғании хешро зинда нигоҳ доштаанд. Ҳамин аст, ки осори пурмуҳтавои олимону бузургони тоҷику форс аз қадим байни оламиён машҳур гардида, дар байни ҳаводорони шеъру адаб ҷойгоҳи махсус касб намудааст.

Дар форум масъалаҳои таҳлил ва муайян намудани самтҳои афзалиятноки корҳои муштараки илмӣ, мусоидат ба ҳамгироии самараноки илмӣ дар Тоҷикистон ва Эрон, таҳия ва лоиҳаҳои нави илмӣ, гузаронидани экспедитсияҳои якҷояи илмӣ, мусоидат ба паҳн намудани таҷрибаи истеҳсолот дар соҳаи илм дар Тоҷикистон ва Эрон бо мақсади баланд бардоштани сифати тайёр намудани кадрҳои илмӣ, муайян намудани самтҳои афзалиятноки рушди таҳқиқоти илми бунёдӣ ва таҳияи тадбирҳо оид ба ҷорӣ намудани натиҷаи онҳо дар самти илми муосир мавриди таҳлилу баррасӣ қарор дода шуданд.

Таъкид шуд, ки мо бояд дар оянда дар масъалаи ба даст овардани созишнома оид ба самтҳои афзалиятноки якҷояи таҳқиқоти илмӣ, ҳамоҳангсозии лоиҳаҳои муштараки илмии Академияи миллии илмҳои Тоҷикистон бо Ҷумҳурии Исломии Эрон, ба даст овардани мавқеи мувофиқ доир ба ташкил ва гузаронидани таҷрибаи илмӣ табодули афкор намуда, дар ин самт ҳамкории илмиро тақвият бахшем.

Дар идома олимону пажуҳишгарони Тоҷикистон ва Эрон маъруза намуда, оид ба дурнамо ва рушди ҳамкории илмию таҳқиқотии ҷонибҳо сухан намуданд.

Шаҳлои САДРИДДИН,
Тоҳир САИДЗОДА (АКС),
АМИТ «Ховар»

Январь 15, 2025 16:30

Хабарҳои дигари ин бахш

Имрӯз дар Душанбе намоиш-фурӯши китоб баргузор мегардад
Моҳи март дар Душанбе Фестивали «Сад ранги чакан» ва намоиш-фурӯши маҳсулоти нақшдӯзиву зардӯзии чаканӣ баргузор мешаванд
Ҳунармандони Театри давлатии академии калони Узбекистон ба номи Алишер Навоӣ ба Тоҷикистон меоянд
«САД РАНГИ ЧАКАН». Дар Исфара даври шаҳрии фестивали ҷумҳуриявӣ баргузор шуд
Дар муассисаҳои илмии Академияи миллии илмҳои Тоҷикистон 20 озмоишгоҳи замонавӣ ба истифода дода шуд
Донишҷӯёни тоҷики Донишкадаи умумирусиягии кинематографияи шаҳри Москва бо хобгоҳ ва стипендия таъмин карда мешаванд
НИШАСТИ МАТБУОТӢ. Донишкадаи давлатии санъати тасвирӣ ва дизайни Тоҷикистон бо 19 муассисаи таҳсилоти олии хориҷӣ ҳамкорӣ дорад
НИШАСТИ МАТБУОТӢ. Донишҷӯёни Консерваторияи миллӣ дар Озмуни ҷумҳуриявии «Тоҷикистон — Ватани азизи ман» соҳиби Шоҳҷоиза ва ҷойҳои намоён гардиданд
Агентиҳои иттилоотии Тоҷикистон ва Чин ба марҳалаи нави ҳамкорӣ ворид мешаванд
Таҳкими ҳамкорӣ дар самти дастгирии иттилоотӣ ва тарғиби сиёсати дӯстонаи Тоҷикистон ва Чин баррасӣ шуд
Ба бузургдошти мутафаккири барҷастаи тоҷик Абӯалӣ ибни Сино симпозиуми байналмилалӣ доир мешавад
Дар шаҳри Теҳрон «Шаби Тоҷикистон» баргузор гардид