ДАРАХТ БИШНОН! Дар шоҳроҳи Душанбе — Варзоб беш аз 500 бех ниҳоли санавбар шинонида шуд

ДУШАНБЕ, 02.01.2025 /АМИТ «Ховар»/. Дар доираи татбиқи «Барномаи давлатии кабудизоркунӣ барои давраи то соли 2040» дар шоҳроҳи Душанбе — Варзоб ва мавзеи «Баҳор»-и ноҳияи Варзоб беш аз 500 бех ниҳоли санавбар шинонида шуд, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Тавре масъулин иброз доштанд, маъракаи ниҳолшинонӣ дар асоси дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҷиҳати рушди устувори экологӣ, аз ҷумла ба сатҳи муайян коҳиш додани оқибатҳои манфии тағйирёбии номусоиди иқлим ба ҳаёти одамон ва мавҷудоти дигари зиндаи табиат аз ҷониби Кумитаи ҳифзи муҳити зисти назди Ҳукумати Ҷумҳурии Тоҷикистон гузаронида шуд.

Дар маъракаи ниҳолшинони кормандони Кумитаи ҳифзи муҳити зисти назди Ҳукумати Ҷумҳурии Тоҷикистон, марказу муассисаҳо ва мақомоти зертобеи он дар шаҳри Душанбе ва ноҳияҳои наздики маркази пойтахт иштирок доштанд.

Чунин тадбирҳои сабзу хуррамгардонии муҳити зист дар дигар шаҳру ноҳияҳои ҷумҳурӣ дар сатҳи зарурӣ бо мусоидат ва саҳмгузории мақомоти ҳифзи муҳити зисти ҷумҳурӣ ва дар ҳамкорӣ бо ниҳодҳои давлатию ҷамъиятӣ гузаронида шуда истодааст.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон