ҲХДТ дар ҳавзаи якмандатии интихоботии Рӯдакӣ, №9 номзад пешниҳод намуд

ДУШАНБЕ, 09.01.2024. /АМИТ «Ховар»/. 8 январ дар ноҳияи Варзоб зимни баргузории маҷлиси якҷояи кумитаҳои иҷроияи Ҳизби Халқии Демократии Тоҷикистон дар ноҳияҳои Рӯдакӣ ва Варзоб номзади Ҳизби Халқии Демократии Тоҷикистон ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи якмандатии интихоботии Рӯдакӣ, №9 пешбарӣ гардид, хабар медиҳад АМИТ «Ховар».

Дар маҷлис масъалаҳои тасдиқи Нақшаи чорабиниҳо оид ба тарғибу ташвиқи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон аз 28 декабри соли 2024 «Дар бораи самтҳои асосии сиёсати дохилӣ ва хориҷии ҷумҳурӣ», таъсиси Ситоди пешазинтихоботии Кумитаи иҷроияи Ҳизби Халқии Демократии Тоҷикистон дар ноҳияи Варзоб ва пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи якмандатии интихоботии Рӯдакӣ, №9 баррасӣ гардиданд.

Дар асоси талаботи моддаи 31-и Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» номзадии Шерализода Муҳаммадулло Умар ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатии Рӯдакӣ, №9 ба муҳокимаи аъзои Кумитаи иҷроия пешниҳод гардид.

АКС: Ҳизби Халқии Демократии Тоҷикистон