Масрур Ғафуров бо дастаи футболи «Истиқлол»-и шаҳри Душанбе шартномаи сесола ба имзо расонид

ДУШАНБЕ, 23.01.2025 /АМИТ «Ховар»/. Дастаи футболи «Истиқлол»-и шаҳри Душанбе дар равзанаи кунунии трансферӣ бо дастпарвари худ-ҳуҷумкунандаи 19-сола Масрур Ғафуров шартномаи сесола ба имзо расонид. Дар ин хусус шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.

Масрур Ғафуров аъзои дастаи мунтахаби ҷавонони то 20-солаи Тоҷикистон мебошад. Хатмкардаи мактаби футболи «Истиқлол»-и шаҳри Душанбе буда, мураббияш Алишер Тағоев аст.

Масрур Ғафуров дар ҳайати дастаи мунтахаби наврасони то 16-солаи Тоҷикистон низ ҳунарнамоӣ намудааст. Масрур Ғафуров дар мусобиқаи байналмилалии «Ҷоми рушд-2022» дар шаҳри Минск бо задани шаш гол беҳтарин нишонзани мусобиқа гардида буд.

Бояд гуфт, ки Масрур Ғафуров дар ду мавсими охир дар ҳайати дастаи футболи «Барқчӣ»-и шаҳри Ҳисор ҳунарнамоӣ мекард.

АКС: Федератсияи футболи Тоҷикистон