ИНТИХОБОТИ ВАКИЛОНИ ХАЛҚ-2025. Тартиби ташкили хазинаи интихоботӣ ва истифодаи он тасдиқ гардид

ДУШАНБЕ, 13.01.2025. /АМИТ «Ховар»/. Имрӯз таҳти роҳбарии раиси Комиссияи марказии интихобот ва раъйпурсии Ҷумҳурии Тоҷикистон Бахтиёр Худоёрзода ҷаласаи навбатии Комиссияи марказӣ баргузор гардид. Дар ин хусус ба АМИТ «Ховар» дар Комиссияи марказии интихобот ва раъйпурсии Ҷумҳурии Тоҷикистон хабар доданд. 

Зимни ҷаласа таъкид шуд, ки мутобиқи қонунгузории Ҷумҳурии Тоҷикистон дар бораи интихобот ташвиқоти пешазинтихоботӣ баъди бақайдгирии номзад оғоз ёфта, як шабонарӯз пеш аз интихобот қатъ мегардад.

Ҳамзамон Комиссияи марказӣ бо қарорҳои дахлдор Тартибро дар бораи ташкили хазинаи интихоботӣ, истифодаи он аз ҷониби номзад ба вакилии Маҷлиси намояндагони Маҷлиси Олии Ҷумҳурии Тоҷикистон ва ҳизбҳои сиёсие, ки ба ҳавзаи ягонаи умумиҷумҳуриявӣ номзад пешбарӣ намудаанд, баррасӣ ва тасдиқ кард.

Инчунин барои инъикоси ҳамаҷонибаи интихоботи дарпешистода, дастрас намудани маълумоти саривақтӣ, саҳеҳ ва ошкоро ба интихобкунандагони Ҷумҳурии Тоҷикистон қарори дахлдори Комиссияи марказӣ оид ба бақайдгирии намояндагони воситаҳои ахбори оммаи ҷумҳуриявӣ дар интихоботи Маҷлиси намояндагони Маҷлиси Олии Ҷумҳурии Тоҷикистон қабул шуд.

Иброз гардид, ки воситаҳои ахбори оммаи ҷумҳуриявӣ баъди бақайдгирӣ ҳуқуқи инъикоси раванди интихоботро пайдо мекунанд.

Корҳои омодагӣ барои дар сатҳи баланди ташкилию  сиёсӣ баргузор намудани интихоботи даъвати нави вакилони Маҷлиси намояндагони Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ идома доранд.

АКС: АМИТ «Ховар»