«Амонатбонк» ва Бонки аврупоии таҷдид ва рушд Рӯзи дарҳои кушод баргузор намуданд

ДУШАНБЕ, 25.02.2025 /АМИТ  «Ховар»/. Корхонаи воҳиди давлатии Бонки амонатгузории Ҷумҳурии Тоҷикистон  «Амонатбонк» дар ҳамкорӣ бо Бонки аврупоии таҷдид ва рушд дар шаҳри Душанбе барои соҳибкорон ва муштариён Рӯзи дарҳои кушод баргузор намуданд.

АМИТ «Ховар» бо истинод ба «Амонатбонк» иттилоъ медиҳад, ки  дар маросими ифтитоҳи чорабинӣ роҳбарияти  «Амонатбонк», Вазорати молияи ҷумҳурӣ  ва роҳбари намояндагии Бонки аврупоии таҷдид ва рушд дар Тоҷикистон вобаста ба анҷоми муваффақонаи барномаҳои «Банақшагирии гузариши иқлим» ва «RSBP /Барномаи минтақавии тиҷорати хурд/-боло бурдани иктидори кадрӣ» ибрози назар намуданд.

Дар доираи Рӯзи дарҳои кушоди Бонки аврупоии таҷдид ва рушд мутахассисони бахши қарзии «Амонатбонк» аз вилоятҳои Суғду Хатлон, навоҳии тобеи марказ ва шаҳри Душанбе ба омӯзиши мавзуи «Таҳлили лоиҳаҳои сармоягузории тиҷорати хурду миёна» барои баланд бардоштани малакаи касбии худ ва муштариёни «Амонатбонк» ба омӯзиши мавзуи «Тавсеаи тиҷорат бо рушду тавонмандиҳои содиротӣ» фаро гирифта шуданд.

Дар анҷом «Амонатбонк»  ва як зумра кормандони он аз ҷониби Бонки аврупоии таҷдид ва рушд барои анҷоми муваффақонаи барномаи омӯзишии «Банақшагирии гузариши иқлим» ва хатми муваффақонаи давраи омӯзишӣ дар доираи барномаи «RSBP — Боло бурдани иқтидори кадрӣ» сазовори ҷоиза гардиданд.

АКС: «Амонатбонк»