КИШТИ БАҲОРӢ. Ҳайати Ситоди ҷумҳуриявӣ оид ба вусъати корҳо дар соҳаи кишоварзӣ бо омодагии деҳқонони шаҳри Ҳисор шинос шуд

ДУШАНБЕ, 08.02.2025 /АМИТ «Ховар»/. 7 феврал дар шаҳри Ҳисор ҳайати Ситоди ҷумҳуриявӣ оид ба вусъати корҳо дар соҳаи кишоварзӣ бо фаъолияти кишоварзон ва омодагии онҳо ба мавсими нави кишт шинос гардид.

Тавре ба АМИТ «Ховар» дар Мақомоти иҷроияи ҳокимияти давлатии шаҳри Ҳисор хабар доданд, ҳайати мазкур бо сохтори кишти баҳорӣ, ҷобаҷогузории зироат, истифодаи самараноки замин аз наздик шинос шуда, оид ба баланд бардоштани ҳосили зироат ва бартараф намудани мушкилоти соҳа ба масъулин тавсияҳо дод.

Ҳайат ҳамчунин бо фаъолияти Ҷамъияти дорои масъулияти маҳдуди «Латиф Муродов», пойгоҳи обкашии «Чоряккорон-2» ва Корхонаи воҳиди таълимӣ таҷрибавии «Ҳисор»-и Донишгоҳи аграрии Тоҷикистон шинос гардид.

Иттилоъ дода шуд, ки аз пойгоҳи обкашии «Чоряккорон-2» 560 гектар майдонҳои кишоварзии шаҳри Ҳисор ва 80 гектар заминҳои сокинони ноҳияи Рӯдакӣ обёрӣ мешаванд.

Дар шаҳри Ҳисор 10 пойгоҳи обкашӣ, ки барои обёрӣ кардани 1637 гектар замин пешбинӣ шудаанд, пурра ба мавсим омода мебошанд.

Иброз гардид, ки беҳтар гаштани навъи зироати кишоварзӣ ба тухмипарварӣ алоқамандии зиёд дорад. Сифатнокии тухмии зироат яке аз омилҳои муҳимтарини ҳосилнокӣ ба ҳисоб меравад. Иқлими Тоҷикистон ба тухмипарварӣ мусоид буда, бояд бозорҳои дохилӣ бо тухмиҳои хушсифати худӣ таъмин гарданд.

Соли 2024 ҳаҷми маҳсулоти кишоварзӣ дар ҳама шаклҳои хоҷагидорӣ ба 1 миллиарду 541 миллионну 831 ҳазор сомонӣ баробар гардида, суръати рушд 111 фоизро ташкил дод.

Дар шаҳр заминҳои истифодаи кишоварзӣ 57 ҳазору 325 гектар буда, аз он 7 ҳазору 471 гектарро заминҳои корами обӣ, 4 ҳазору 419 гектарро заминҳои корами лалмӣ, 3 ҳазору 923 гектарро боғ, 3 ҳазору 566 гектарро токзор ва боқимондаро тутзор, ниҳолпарваришгоҳҳо, ва чарогоҳҳои тобистона ташкил медиҳанд.

АКС: Мақомоти иҷроияи ҳокимияти давлатии шаҳри Ҳисор