«ҶОМИ РУШД-2025». Дастаи мунтахаби наврасони Тоҷикистон (U-17) бар дастаи Эрон зафар ёфт

ДУШАНБЕ, 22.02.2025 /АМИТ «Ховар»/. Дар бозии ниҳоӣ дар мусобиқаи байналмилалии «Ҷоми рушд-2025», ки дар Минск идома дорад, тими наврасони Тоҷикистон (U-17) таҳти роҳбарии Марко Раҷини бар дастаи Эрон пирӯз гардид, хабар медиҳад АМИТ «Ховар» бо истинод ба Федератсияи футболи Тоҷикистон.

Вақти асосии вохӯрӣ мусовӣ – 0:0 анҷом ёфта, дар силсилазарбаҳои пеналти футболбозони мо бо ҳисоби 4:1 ғалаба намуданд.

Ба ин тартиб, дастаи мунтахаби наврасони Тоҷикистон (U-17) дар мусобиқаи шаҳри Минск чаҳор бозӣ анҷом дод. Қаблан дастаи мо дар марҳилаи гурӯҳии мусобиқот аз дастаҳои Беларус (0:1) ва Узбекистон (1:3), инчунин аз Академияи «Blockchain Sports»-и Бразилия (0:1) мағлуб шуда буд.

Бояд таъкид намуд, ки дар Ҷоми Осиё-2025 дар Арабистони Саудӣ дастаи мунтахаби наврасони Тоҷикистон (U-17) дар гурӯҳи «D» бо дастаҳои Уммон (5 апрел), Кореяи Шимолӣ (8 апрел) ва Эрон (11 апрел) рақобат менамояд.

АКС: Федератсияи футболи Тоҷикистон