Ба ифтихори Наврӯз дар Мактаб-интернати ҷумҳуриявӣ барои кӯдакони ятими ноҳияи Ёвон базми идона доир шуд

ЁВОН, 23.03.2025. /АМИТ «Ховар»/.  Дар партави сиёсати инсондӯстонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва иқдоми наҷиби Мақомоти иҷроияи ҳокимияти давлатии ноҳияи Ёвон  бахшида ба ҷашни Наврӯз бо иштироки роҳбарияти ноҳия дар Мактаб-интернати ҷумҳуриявӣ барои кӯдакони ятими ноҳияи Ёвон базми идона доир карда шуд. Дар ин хусус ба хабарнигори  АМИТ «Ховар» Субҳониддини Маҳмуд масъулини Мақомоти иҷроияи ҳокимияти давлатии ноҳияи Ёвон иттилоъ доданд.

Дар ҳамоиши идона иброз гардид, ки Ҳукумати Ҷумҳурии Тоҷикистон таҳти сиёсати хирадмандонаи Пешвои миллат муҳтарам Эмомалӣ Раҳмон ба соҳаи илму маориф таваҷҷуҳи хосса зоҳир менамояд. Ятимону бепарасторон, ки бо амри тақдир аз падару модар маҳрум мондаанд, ҳамеша таҳти ғамхорӣ қарор доранд. Тавре Пешвои миллат муҳтарам Эмомалӣ Раҳмон таъкид менамоянд, «ман ҳеҷ гоҳ ятимону бепарасторонро, ки бо ҳукми тақдир аз падару модар маҳрум мондаанд, танҳо намегузорам».

Меҳмонон бо маҳсули даст ва ҳунари зебои таълимгирандагон, сифати таълим ва шароити буду боши онҳо шинос шуданд.

Барои болидаруҳии ятимони ин даргоҳ  барномаи ҷолиби фарҳангии наврӯзӣ пешниҳод карда шуд.

Дар айни замон  дар ин муассиса  169 нафар тарбиятгирандагон ба таълиму тадрис фаро гирифта шуда ва ба таври доимӣ аз дастгирию ғамхориҳои доимии давлат  бархӯрдор мебошанд.

Хонандагони ин муассиса ҳамасола дар озмунҳои ҷумҳуриявӣ фаъолона иштирок намуда, сазовори ҷойҳои намоён мегарданд. Онҳо дар  ин даргоҳи илму адаб донишҳои муосирро азхуд карда, дар ободию шукуфоӣ ва пешрафти Тоҷикистон саҳми арзанда мегузоранд.

АКС: Мақомоти иҷроияи ҳокимияти давлатии ноҳияи Ёвон