Ба муносибати Ҷашни байналмилалии Наврӯз дар ноҳияҳои шаҳри Душанбе барномаҳои фарҳангӣ-фароғатӣ баргузор шуданд

ДУШАНБЕ, 21.03.2025. /АМИТ «Ховар»/. Ба ифтихори Ҷашни байналмилалии Наврӯз дар ноҳияҳои шаҳри Душанбе барномаҳои фарҳангиву фароғатӣ баргузор гардиданд. Аз ҷумла, дар Муассисаи давлатии «Аҳорун»  аз ҷониби Мақомоти иҷроияи ҳокимияти давлатии ноҳияи Исмоили Сомонии шаҳри Душанбе маҳфили идона баргузор гардид, иттилоъ медиҳад АМИТ «Ховар».

Дар оғоз намояндагон бо намоиши дастовардҳои ноҳияи Исмоили Сомонӣ ва ҳунарҳои зебо шинос шуда,  изҳор намуданд, ки аҷдододони соҳибфарҳанги мо дар таърихи беш аз шашҳазорсолаи Наврӯз онро ҳамчун суннати муқаддасу муборак аз насл ба насл ба мерос гузошта, бо ҳама рангорангиву руҳи зиндагисозаш гиромӣ доштаанд ва барои пойдории он талош намуданд.

Инчунин дар Муассисаи давлатии «Боғи фарҳангии фароғатии ба номи А.Фирдавсӣ» дар фазои идона чорабинии тантанавӣ бахшида ба таҷлили куҳанҷашни ниёгони пурифтихор — Наврӯзи байналамилалӣ баргузор карда шуд.

Дар намоиш дастовардҳои ҳунарӣ, косибӣ ва анвои гуногуни хӯрокҳо ва либосҳои миллӣ ба маърази тамошо гузошта шуда, ба фазои идона ҳусну таровати тоза зам гардид. Меҳмонони хориҷӣ аз давлатҳои ҳавзаи тамаддуни Наврӯз ва кишварҳои дигар намоишро тамошо намуда, бо таассуроти наҷиб ба он баҳои баланд доданд.

Дар Боғи фарҳангию фароғатии «Умари Хайём»-и ноҳияи Синои шаҳри Душанбе низ  ҷашни бошукуҳи наврӯзӣ баргузор гардид.

Дар он кулли сокинони ноҳия ҳунарҳои мардумии худро намоиш дода, Наврӯзро сазовор пешвоз гирифтанд.

Таъкид карда шуд, ки бо дастгириҳои пайваста ва сиёсати хирадмандонаи Президенти Ҷумҳурии Тоҷикистон муҳтарам Эмомалӣ Раҳмон Наврӯз ҷашни ҷаҳонӣ шуд.

Наврӯз, ки соҳиби таърихи зиёда аз шашҳазорсола аст, дар масири таърих аз тобишҳои сиёсии вақт эмин монда, ҳамчун суннати волои фарҳангӣ то ба имрӯз ҷашн гирифта мешавад.

Пайдоиш ва ташаккули он ба умқи дури таърих рафта, бо фарҳанги бузургу оламгири мардуми ориёитабор пайваст мебошад.

АКС аз манбаъҳои боз