Байни минтақаҳои Тоҷикистон ва Амороти Муттаҳидаи Араб ҳамкорӣ амалӣ мешавад

ДУШАНБЕ, 07.03.2025. /АМИТ «Ховар»/.  Дар ҳошияи сафари корӣ ба Амороти Муттаҳидаи Араб Вазири саноат ва технологияҳои нави Ҷумҳурии Тоҷикистон Шералӣ Кабир бо Ҳокими Аморати Раъс Ал Хайма Шайх Саъуд ибни Сақр Оли Қосимӣ мулоқот намуд. Дар ин хусус ба АМИТ «Ховар» аз Сафорати Ҷумҳурии Тоҷикистон дар Амороти Муттаҳидаи Араб хабар доданд.

Бино ба маълумоти сарчашма, ҳадафи асосии вохӯрӣ аз баррасии масоили татбиқи ҳамкорӣ байни минтақаҳои гуногуни Ҷумҳурии Тоҷикистон ва Амороти Муттаҳидаи Араб тавассути ҷалби сармоя дар бахшҳои саноати сабук ва истихроҷи маъдан, энергетика ва об, нақлиёт ва коммуникатсия, коркарди маҳсулоти кишоварзӣ ва сайёҳӣ иборат буд.

Ҷонибҳо инчунин масоили ташкили корхонаҳои муштараки шаклҳои гуногуни фаъолият, рушди бахшҳои бунёдӣ ва воқеии иқтисодиёт, фаъол намудани абзори соҳавии ҳамкорӣ, татбиқи лоиҳаҳои муштараки истеҳсолӣ бо истифода аз фанновариҳои муосир ва барномаҳои нармафзори зеҳни сунъиро баррасӣ намуданд.

АКС: Сафорати Ҷумҳурии Тоҷикистон дар Амороти Муттаҳидаи Араб