Байни «Саноатсодиротбонк» ва Клуби футболи «Истиқлол» созишномаи ҳамкорӣ ба имзо расид

ДУШАНБЕ, 05.03.2025. /АМИТ «Ховар»/. Байни Корхонаи воҳиди давлатии Бонки саноатию содиротии Тоҷикистон «Саноатсодиротбонк» ва Клуби футболи «Истиқлол»  созишномаи ҳамкорӣ ба имзо расонида шуд.

Тавре ба АМИТ «Ховар» аз Бонки саноатию содиротии Тоҷикистон «Саноатсодиротбонк» иттилоъ доданд, созишномаи ҳамкорӣ бо иштироки муовини Раиси Раёсати Бонк Шуҳрат Муҳиддинзода ва директори генералии Клуби футболи «Истиқлол»  Шаҳзод Сулаймонов ба имзо расид.

Тибқи бандҳои созишнома, тамғаи молии «Саноатсодиротбонк» аз ин ба баъд дар ҳамаи бозиҳои даста, инчунин дар ҳаёти иҷтимоии клуб ва намолавҳаҳои атрофи майдони варзишгоҳ ва воситаҳои таблиғотии Клуби футболи «Истиқлол» васеъ инъикос мегардад.

Директори генералии Клуби футболи «Истиқлол»  Шаҳзод Сулаймонов иброз намуд, ки «шарикӣ бо ин бонк қадами ҷиддӣ ба пеш барои рушди ин клуби футбол аст. Ман боварӣ дорам, ки мо якҷоя барои муаррифии футболи мамлакат дар майдонҳои дохилӣ ва хориҷи Тоҷикистон ба муваффақияти назаррас ноил мегардем».

АКС: Корхонаи воҳиди давлатии Бонки саноатию содиротии Тоҷикистон «Саноатсодиротбонк»