ЧЕМПИОНАТИ ТОҶИКИСТОН. Бозиҳои даври сеюми дастаҳои Лигаи олӣ оид ба футбол оғоз мегарданд

Март 28, 2025 13:20

ДУШАНБЕ, 28.03.2025 /АМИТ «Ховар»/. Имрӯз бозиҳои даври сеюми Чемпионати Тоҷикистон оид ба футбол байни дастаҳои Лигаи олӣ оғоз гардида, то 29 марти соли 2025 идома меёбанд. Дар ин хусус шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.

Дар мусобиқаи имсолаи Лигаи олии футболи Тоҷикистон, ки бори 34-ум доир мегардад, 12 даста иштирок дорад. Бо сабаби омода набудани майдонҳо панҷ бозии даври сеюми мусобиқаи Лигаи олӣ дар Варзишгоҳи марказии шаҳри Душанбе ва танҳо як бозӣ дар Варзишгоҳи марказии шаҳри Истаравшан баргузор мегарданд.

Имрӯз, 28 март се бозӣ байни дастаҳои футболи КМВА -и шаҳри Душанбе бо «Ҳулбук»-и ноҳияи Восеъ, «Вахш»-и шаҳри Бохтар бо «Регар-ТадАЗ»-и шаҳри Турсунзода ва «Барқчӣ»-и шаҳри Ҳисор бо «Панҷшер»-и ноҳияи Ҷалолиддини Балхӣ дар шаҳри Душанбе ва як бозии дигар байни дастаҳои футболи «Истаравшан»-и шаҳри Истаравшан бо «Эсхата»-и шаҳри Хуҷанд дар шаҳри Истаравшан баргузор мешаванд.

Ду бозии дигари даври дуюм 29 март дар Варзишгоҳи марказии шаҳри Душанбе доир шуда, дастаҳои футболи «Равшан»-и шаҳри Кӯлоб бо «Хуҷанд»-и шаҳри Хуҷанд ва «Истиқлол»-и шаҳри Душанбе бо «Ҳосилот»-и ноҳияи Фархор рақобат менамоянд.

Баъди натиҷагирии бозиҳои даври дуюми мусобиқа дар ҷадвал дастаҳои футболи КМВА-и шаҳри Душанбе, «Вахш»-и шаҳри Бохтар, «Ҳулбук»-и ноҳияи Восеъ ва «Истиқлол»-и шаҳри Душанбе бо шашимтиёзӣ мутаносибан ҷойҳои аз якум то чаҳорумро гирифтаанд. Се даста – «Хуҷанд», «Ҳосилот» ва «Панҷшер» – бе имтиёз дар зинаҳои охири ҷадвал қарор доранд.

Чемпионати Тоҷикистон дар ду давра доир шуда, ҳар даста 22 бозӣ анҷом медиҳад. Дастае, ки имсол дар мусобиқаи Лигаи олӣ ҷойи охиринро ишғол менамояд, ба Лигаи якум мегузарад ва дастае, ки ҷойи ёздаҳумро мегирад, бо барандаи медали нуқраи Лигаи аввали Тоҷикистон дар соли 2025 бозиҳои гузаришӣ доир менамояд.

Оғози ҳамаи бозиҳои даври сеюми Чемпионати Тоҷикистон оид ба футбол байни дастаҳои Лигаи олӣ муайян шуд.

28 март (ҷумъа)
КМВА – «Ҳулбук»
Оғози бозӣ – соати 15:00
Сардовар: Абдулло Давлатов (Шаҳринав)
Душанбе, Варзишгоҳи марказии ҷумҳуриявӣ

28 март (ҷумъа)
«Истаравшан»– «Эсхата»
Оғози бозӣ – соати 16:00
Сардовар: Наврӯз Воҳидов (Вахш)
Истаравшан, Варзишгоҳи марказӣ

28 март (ҷумъа)
«Вахш» – «Регар-ТадАЗ»
Оғози бозӣ – соати 18:00
Сардовар: Насрулло Кабиров (Норак)
Душанбе, Варзишгоҳи марказии ҷумҳуриявӣ

28 март (ҷумъа)
«Барқчӣ» – «Панҷшер»
Оғози бозӣ – соати 21:00
Сардовар: Амирҷон Хоркашев (Душанбе)
Душанбе, Варзишгоҳи марказии ҷумҳуриявӣ

29 март (шанбе)
«Равшан»– «Хуҷанд»
Оғози бозӣ – соати 15:00
Сардовар: Гулмуроди Саъдулло (Душанбе)
Душанбе, Варзишгоҳи марказии ҷумҳуриявӣ

29 март (шанбе)
«Истиқлол» – «Ҳосилот»
Оғози бозӣ – соати 18:00
Сардовар: Хуршед Дадобоев (Хуҷанд)
Душанбе, Варзишгоҳи марказии ҷумҳуриявӣ

Март 28, 2025 13:20

Хабарҳои дигари ин бахш

Ғолибони шоҳҷоизаҳои Мусобиқаи гӯштини миллӣ дар ноҳияи Темурмалик муайян шуданд
Душанбе мизбони Форуми Шурои олимпии Осиё ва ҳамбастагии олимпӣ мегардад
Дар Душанбе Ҷоми ҷаҳон оид ба велосипедронии кӯҳӣ баргузор мегардад
Абдулло Давлатов бозиҳои қисми ниҳоии Ҷоми Осиё-2025-ро доварӣ менамояд
Дастаи мунтахаби наврасони Тоҷикистон (U-17) панҷ бозии санҷишӣ анҷом дод
Рақибони дастаи мунтахаби занонаи Тоҷикистон оид ба футбол дар марҳилаи интихобии Ҷоми Осиё-2026 муайян шуданд
Ғолибони Мусобиқаи байналмилалии гӯштингирӣ дар шаҳри Истаравшан муайян шуданд
Дар Қалъаи Муғтеппаи шаҳри Истаравшан Мусобиқаи байналмилалии гӯштингирӣ оғоз ёфт
Чор паҳлавони тоҷик соҳиби шоҳҷоизаҳо дар мусобиқаи гӯштини миллӣ дар ноҳияи Данғара шуданд
Моҳи май дар Душанбе Мусобиқаи байналмилалии Гран — Слам оид ба гӯштини ҷудо баргузор мегардад
Шакармамад Мирмамадов барандаи Шоҳҷоизаи Мусобиқаи байналмилалии гӯштини миллӣ дар шаҳри Хоруғ гардид
ҶОМИ ОСИЁ-2027. Дастаи мунтахаби Тоҷикистон дар марҳилаи интихобӣ бар тими миллии Тимори Шарқӣ пирӯз шуд