Дабири кулли Созмони ҳамкории иқтисодӣ дар Осорхонаи миллӣ намоиши анъанавии «Аз Наврӯз то Наврӯз»-ро тамошо намуд

ДУШАНБЕ, 27.03.2025 /АМИТ «Ховар»/. Дабири кулли Созмони ҳамкории иқтисодӣ Асад Маҷид Хон дар доираи сафар ба Ҷумҳурии Тоҷикистон зимни сайри осорхонавӣ дар Осорхонаи миллии Тоҷикистон бо таъриху тамаддуни тоҷикон шинос гардид, иттилоъ медиҳад АМИТ «Ховар» бо истинод ба ин осорхона.

Дабири кулли Созмони ҳамкории иқтисодӣ Асад Маҷид Хон намоиши анъанавии Осорхонаи миллии Тоҷикистон «Аз Наврӯз то Наврӯз»-ро тамошо намуд. Инчунин ба ӯ дар толорҳои «Асри санг», «Саразм», «Оини зардуштӣ», «Кулолгарӣ», «Ҳахоманишиҳо», «Сиккаҳо», «Кушониён», «Аҷинатеппа» ва толори «Туҳфаҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон» таърихи куҳани халқи тоҷик ва фарҳанги бисёрҳазорсола муаррифӣ карда шуд.

Пас аз анҷоми сайри осорхонавӣ Дабири кулли Созмони ҳамкории иқтисодӣ Асад Маҷид Хон аз тамошои толорҳои намоишии Осорхонаи миллӣ изҳори хушҳолӣ намуда, ҳамчун анъана дар китоби «Меҳмонони фахрӣ»-и Осорхонаи миллӣ андешаҳояшонро дарҷ намуд.

АКС: Осорхонаи миллии Тоҷикистон