Дар ноҳияи Лахш Ҷашни байналмилалии Наврӯз бо шаҳомати хосса таҷлил карда шуд

ЛАХШ, 22.03.2025 /АМИТ «Ховар»/. Дар Ҷамоати деҳоти Лахши болои ноҳияи Лахш бо иштироки сокинону меҳмонон ба ифтихори Ҷашни байналмилалии Наврӯз барномаи бошукуҳи идона баргузор гардид.  Дар ин хусус ба мухбири минтақавии АМИТ «Ховар» аз Мақомоти иҷроияи ҳокимияти давлатии ноҳияи Лахш иттилоъ доданд.

Дар Наврӯзгоҳи Ҷамоати деҳоти Лахши болои ноҳия аз ҷониби аҳли заҳмати ҷамоат дастранҷи деҳқонону косибон, зардӯзону гулдӯзон, дуредгарону оҳангарон ва таомҳои миллӣ ба маърази тамошо гузошта шуд.

Ба ифтихори  таҷлили сазовори  ҷашни Наврӯзи оламафрӯз дар Ҷамоати деҳоти Лахши боло Фестивали бозиҳои миллии варзишӣ оид ба гӯштингирӣ, дастхобонӣ, бандкашӣ, чилику дангал, хурӯсҷанг, ланкабозӣ ва дигар бозиҳои хоси ин минтақа дар байни наврасону ҷавонон доир карда шуд. Ғолибони бозиҳо ба туҳфаҳо сарфароз гардонида шуданд.

Раиси ноҳияи Лахш Каромиддин Холзода иброз намуд, ки «ҷашни  Наврӯз дарбаргирандаи ҳадафҳои покии зоҳиру ботин, ростию росткорӣ, сидқ дар аҳду паймон, адлу инсоф, нигоҳ доштани ҳадди эътидол дар муносибатҳои хонаводагӣ, ҷамъиятӣ ва илмию фарҳангӣ мебошад. Омили аслии мондагории Наврӯз, пеш аз ҳама, он аст, ки ин ҷашн аз оғози пайдоиш то имрӯз ба суди ҳамагон буду ҳаст. Касоне, ки дар ин ҷашни бузург иштирок менамоянд, низ аз адлу дод ҳимоят ҷуста, бар зиёни ҳеҷ касе иқдоми бад нахоҳанд кард. Он чӣ дар зеҳн ва амалу кирдори мардум дар ёдкарди ин ҷашн рӯ мезанад, шодӣ асту сурур, хайр асту баракат ва тандурустию комёбӣ. Ба ин далел ин суннати фархунда дар зеҳну амалу кирдори мардуми мо одату анъанаи нек гардида, дар шумори корҳое аст, ки иҷрояш барои ҳар фард суннат буда, душвориҳоро мезудояд ва навиду хушию шодмониву некбахтӣ меорад».

Ҳамчунин аз ҷониби аҳли санъату ҳунари ноҳия барномаи бошукуҳи фарҳангӣ пешкаши меҳмонону сокинони Ҷамоати деҳоти Лахши боло гардонида шуд.

АКС: Мақомоти иҷроияи ҳокимияти давлатии ноҳияи Лахш