Ҳайати парлумонии Тоҷикистон дар Форуми байналмилалии «Мероси бузург – ояндаи муштарак» дар Волгоград иштирок менамояд

ДУШАНБЕ, 28.04.2025 /АМИТ «Ховар»/. Ҳайати парлумонии Тоҷикистон таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода барои иштирок дар Форуми байналмилалии «Мероси бузург – ояндаи муштарак» ба шаҳри Волгогради Федератсияи Русия сафар намуд.

Тавре ба АМИТ «Ховар» аз Маҷлиси намояндагон хабар доданд, форум аз 28 апрел то 1 май баргузор шуда, ба 80-солагии Ғалабаи бузург дар Ҷанги дуюми ҷаҳон- рӯйдоде, ки Волгоград имсол онро ба таври бошукуҳ таҷлил менамояд, бахшида шудааст. Мавзуи асосии форум саҳми халқҳои собиқ Иттифоқи Шуравӣ дар ғалаба, мубориза ба муқобили кӯшишҳои аз нав навиштани таърих ва вазифаҳои тарбияи ҳарбӣ-ватандӯстии ҷавонон мебошад.

Дар кори форум вакилони парлумонҳои Иттиҳоди Давлатҳои Мустақил, ҳайатҳои вакилони Чин, Ветнам, Куба, Муғулистон, Сербия, Словакия ва дигар мамлакатҳо иштирок менамоянд.

Дар барномаи форум ҳамчунин ҷаласаҳои пленарӣ, суханрониҳои коршиносони байналмилалӣ, ҷаласаи муштараки Палатаи ҷавонони Иттиҳоди Беларус, Русия ва Парлумони ҷавонони назди Думаи давлатӣ пешбинӣ шудаанд.

Барномаи форум чорабиниҳои зиёди фарҳангию маърифатиро дар бар мегирад.

АКС аз бойгонӣ