Ҳайати расмии Бонки ҷаҳонӣ бо ҷараёни корҳои сохтмонӣ дар Неругоҳи барқи обии «Роғун» шинос шуд

ДУШАНБЕ, 13.04.2025 /АМИТ «Ховар»/. 12 апрел ҳайати расмии Бонки ҷаҳонӣ таҳти роҳбарии Директори идорӣ оид ба фаъолияти амалиётии бонк Анна Бйерде ва ноиби Президенти Бонк оид ба Аврупо ва Осиёи Марказӣ Антонелла Бассани бо ҷараёни корҳои сохтмонӣ дар Неругоҳи барқи обии «Роғун» шинос шуд.

Меҳмононро Сарвазири Ҷумҳурии Тоҷикистон Қоҳир Расулзода дар ҳудуди неругоҳ  ҳамроҳӣ намуд.

Ҳайати Бонки ҷаҳонӣ бо марҳилаҳои асосии сохтмон, иншооти калидӣ ва таҷҳизоти насбшудаи Неругоҳи барқи обии «Роғун» шинос гардид. Инчунин ҳайат аз минтақаҳои муҳими иншоот, аз ҷумла қисматҳои зеризаминӣ, нақбҳои нақлиётӣ ва системаи турбинаҳо боздид ба амал овард. Ба сифати иҷрои корҳо ва ҷараёни татбиқи лоиҳа баҳои мусбат дода шуда, суръати пешрафти он боиси қаноатмандии ҳайат гардид.

Ҳайати меҳмонон ҳамзамон бо мутахассисони тоҷик дар мавзуи татбиқи марҳилаҳои минбаъдаи лоиҳа табодули афкор намуда, изҳори хушнудӣ намуданд, ки чунин иншооти бузурги стратегӣ дар шароити мураккаби техникӣ бо ин сатҳи касбӣ идома дорад.

Анна Бйерде дар охири шиносоӣ ба Китоби ифтихории Неругоҳи барқи обии «Роғун – Кохи Нур» соядаст гузошта, лоиҳаро яке аз муҳимтарин ташаббусҳои энергетикии минтақа арзёбӣ намуд. Вай изҳор дошт, ки «Роғун рамзи иродаи миллӣ, устувории равандҳои рушд ва намунаи ҳамкории муваффақи шарикони байналмилалӣ бо Ҷумҳурии Тоҷикистон мебошад. Мо аз ин пешрафт руҳбаландем ва омодаем ҳамкориро дар ин самт идома диҳем».

АКС: ҶСК Неругоҳи барқи обии «Роғун»