Дар шаҳри Хуҷанд Фестивал-озмуни шаҳрии «Беҳтарин армуғон» баргузор гардид

ДУШАНБЕ, 11.04.2025. /АМИТ «Ховар»/. Бо мақсади тарғибу ташвиқи анъанаҳои миллӣ ва эҳё намудани ҳунарҳои мардумӣ дар шаҳри Хуҷанд Фестивал-озмуни шаҳрии «Беҳтарин армуғон» баргузор шуд.

Тавре аз Мақомоти иҷроияи ҳокимияти давлатии шаҳри Хуҷанд ба АМИТ «Ховар» иттилоъ доданд, дар фестивал-озмун аз ҷониби ҳунармандон кашидадӯзӣ, қуроқбофӣ, атласу адрасбофӣ, кундалнигорӣ ва наққошӣ, кулолгарӣ ва аъҷубасозӣ, коргардӣ санг, чарм, чӯб ва дигар ҳунарҳои мардумӣ пешниҳод шуданд.

Ҳадафи Фестивал-озмуни  «Беҳтарин армуғон» рушди ҳунарҳои миллӣ, эҳёи корҳои дастӣ ва хонагӣ, боло бурдани сифати маҳсулоти ҳунармандӣ, рақобатпазир гаштани онҳо дар бозори ҷаҳонӣ ва муайяну дастгирӣ намудани беҳтарин занони ҳунарманд мебошад.

АКС: Мақомоти иҷроияи ҳокимияти давлатии шаҳри Хуҷанд