Директори Хадамоти федералии приставҳои судии Федератсияи Русия бо таъриху тамаддуни тоҷикон шинос шуд

ДУШАНБЕ, 24.04.2025 /АМИТ «Ховар»/. Директори Хадамоти федералии приставҳои судии Федератсияи Русия Дмитрий Аристов,   ки бо мақсади густариши ҳамкорӣ бо мақомоти дахлдори Тоҷикистон дар шаҳри Душанбе қарор дорад, ба Осорхонаи миллии Тоҷикистон рафта, бо таъриху фарҳанги бостонии миллати тоҷик  шинос шуд. Дар ин хусус АМИТ «Ховар» бо истинод ба Осорхонаи миллии Тоҷикистон иттилоъ медиҳад.

Зимни  сайри осорхонавӣ  ба ҳайати Хадамоти федералии приставҳои судии Федератсияи Русия дар толорҳои «Асри санг»,   «Саразм», «Оини зардуштӣ», «Кулолгарӣ», «Ҳахоманишиҳо», «Сиккаҳо», «Кушониён», «Аҷинатеппа» ва толори «Туҳфаҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон» таърихи куҳани халқи тоҷик ва фарҳанги бисёрҳазорсола муаррифӣ гардид.

Дар анҷом Дмитрий Аристов  ва ҳайати ҳамроҳонаш аз тамошои толорҳои намоишии Осорхонаи миллии Тоҷикистон  изҳори хушнудӣ намуда, ҳамчун анъана дар китоби «Меҳмонони фахрӣ»-и Осорхонаи миллӣ таассуроташонро навиштанд.

 АКС: Осорхонаи миллии Тоҷикистон