Имкониятҳои сайёҳии табобатии Тоҷикистон муаррифӣ гардиданд

ДУШАНБЕ, 11.04.2025. /АМИТ «Ховар»/. Имрӯз дар шаҳри Душанбе дар мавзӯи «Таҳкими устувории саломатӣ дар бахши сайёҳӣ» мизи мудаввар баргузор гардид. Дар ин хусус ба АМИТ «Ховар» аз Кумитаи рушди сайёҳии назди Ҳукумати Ҷумҳурии Тоҷикистон хабар доданд.

Дар он роҳбарияти Кумитаи рушди сайёҳӣ, намояндагони Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Бонки Осёии рушд ва дигар вазорату идораҳои дахлдор иштирок намуданд.

Муовини раиси Кумитаи рушди сайёҳӣ Зиёдулло Салимзода тариқи рӯнамо вобаста ба имкониятҳои сайёҳии табобатии Ҷумҳурии Тоҷикистон маълумот пешниҳод намуд.

Таъкид карда шуд, ки рушди сайёҳии табобатӣ, солимгардонӣ, санаторӣ ва истироҳатӣ яке аз ҳадафҳои асосии «Стратегияи рушди сайёҳӣ дар Ҷумҳурии Тоҷикистон барои давраи то соли 2030» маҳсуб ёфта, бо дастгириҳои Ҳукумати Ҷумҳурии Тоҷикистон аз ҷониби Кумита ин намуди сайёҳӣ дар баргузории намоишгоҳҳои байналмилалӣ ҳамасола муаррифӣ мегардад.

Иброз гардид, ки дар Тоҷикистон зиёда аз 200 чашмаҳои табобатӣ мавҷуд буда, дар аксари онҳо осоишгоҳҳо сохта шудаанд, ки манбаи сиҳативу омили табобат барои сайёҳони дохилию хориҷӣ ба ҳисоб мераванд. Инчунин осоишгоҳҳои мазкур марказҳои бузурги табобатӣ ва ташхисӣ буда, бо намудҳои гуногуни дастгоҳҳои муолиҷавӣ ва хизматрасонии маданию маишӣ дар дохил ва хориҷи мамлакат маъмуланд.