Масоили мубрами макроиқтисодӣ дар мулоқоти ҳайати Тоҷикистон бо роҳбарияти Хазинаи Байналмилалии Асъор баррасӣ шуд

ДУШАНБЕ, 23.04.2025 /АМИТ «Ховар»/. 22 апрел дар шаҳри Вашингтони Иёлоти Муттаҳидаи Амрико мулоқоти ҳайати Ҷумҳурии Тоҷикистон таҳти роҳбарии Вазири молияи Ҷумҳурии Тоҷикистон Файзиддин Қаҳҳорзода ва Раиси Бонки миллии Тоҷикистон Фирдавс Толибзода бо муовини Директори иҷроияи Хазинаи Байналмилалии Асъор Бо Ли баргузор гардид.

Тавре АМИТ «Ховар» бо истинод ба Вазорати молияи ҷумҳурӣ хабар медиҳад, дар мулоқот ҷонибҳо масъалаҳои мубрами макроиқтисодӣ, идомаи ҳамкорӣ дар чаҳорчӯби Барномаи ҳамоҳангсозии сиёсати иқтисодӣ (PCI) ва дурнамои татбиқи минбаъдаи барномаҳои дастгирии техникӣ ва молиявиро баррасӣ намуданд.

Иброз гардид, ки дар натиҷаи ислоҳоти пайваста иқтисоди Тоҷикистон соли 2024  8,4 фоиз рушд ёфта, таваррум дар сатҳи 3,6 фоиз нигоҳ дошта шуд.

Инчунин ҷонибҳо ҷараёни татбиқи тавсияҳои миссияи Хазинаи Байналмилаллии Асъор ва муваффақияти бадастомадаро дар доираи барномаи мавҷуда муҳокима намуданд. Ҳамзамон механизмҳои нави таъмини устувории корхонаҳои давлатӣ мавриди баррасӣ қарор гирифтанд.

Дар интиҳои мулоқот ҷонибҳо ба зарурати таҳкими минбаъдаи ҳамкорӣ дар самти рушди идоракунии молияи давлатӣ, беҳсозии муҳити сармоягузорӣ, пешниҳоди дастгирии техникӣ ва баррасии имконияти гузариш ба Барномаи нави молиявии Хазинаи Байналмилалии Асъорро дар оянда таъкид намуданд.

АКС: Вазорати молияи Ҷумҳурии Тоҷикистон