Пешвои миллат Эмомалӣ Раҳмон дар ноҳияи Бобоҷон Ғафуров ба сохтмони корхонаи ғанигардонии маъдани оҳани ҶСП «Комбинати металлургии тоҷик» санги асос гузоштанд

Апрель 1, 2025 14:01

ДУШАНБЕ, 01.04.2025 /АМИТ «Ховар»/. 1 апрел бо иштироки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба сохтмони корхонаи ғанигардонии маъдани оҳани ҶСП «Комбинати металлургии тоҷик» дар ноҳияи Бобоҷон Ғафуров санги асос гузошта шуд.

Ин боз як қадами устувор ба сӯйи рушди минбаъдаи соҳаи саноати маъдан, афзоиши иқтидори истеҳсолии кишвар ва содироти маҳсулоти ватанӣ мебошад, зеро ин нахустин корхонаи ғанигардонии маъдан дар Тоҷикистон дар давраи соҳибистиқлолӣ хоҳад буд.

Корхонаи мазкур ҷиҳати истихроҷ ва коркарди маъдани оҳану дигар маъданҳои ҳамроҳ ва истеҳсолу содироти маҳсулоти босифат аз он бо сармояи ватаниву хориҷӣ бунёд ва бо технологияҳои замонавӣ муҷаҳҳаз мегардад. Танҳо захираи маъдани оҳан дар ин кон наздики 60 миллион тонна мебошад.

Корхона дар ду марҳила бунёд ёфта, марҳилаи аввали он то соли 2027 ва дуюмаш то соли 2031 ба кор дароварда мешавад. Иқтидори лоиҳавии солонаи корхона истихроҷ ва коркарди 2,5 миллион тонна маъдан буда, аз он 1,1 миллион тонна консентрати истеҳсолӣ ба даст меояд. Ҳаҷми маъдани оҳан дар хока 62-65 фоизро ташкил медиҳад. Аз ин кон ҳамчунин, дигар маъданҳои сиёҳ ва рангаи ҳамроҳ истеҳсол хоҳад шуд.

Корхонаи мазкур натанҳо ивазкунандаи воридот аст, балки қисми зиёди маҳсулоташ ба содирот нигаронида шудааст.

Ҳоло дар корҳои сохтмонӣ 600 нафар мутахассиси маҳаллӣ ва хориҷӣ ба кор ҷалб шуда, пас аз ба кор даромадани марҳилаи аввали корхона 1200 нафар ва баъди пурра омода шудани корхона дар он беш аз 2000 нафар бо кори доимӣ ва моҳонаи хуб таъмин хоҳанд шуд.

Иттилоъ дода шуд, ки барои таъмини рафти сохтмон бо қуму шағал ва бетон дар дохили корхона коргоҳи истеҳсоли чунин маҳсулот мавҷуд аст.

Барои таъмини фаъолияти мунтазами корхона, сохтмони инфрасохтори зарурӣ, аз ҷумла хатти баландшиддати барқии 220 кВ ба масофаи 14 киллометр, хатти об аз 17 километр ва 15 километр роҳи мошингард идома дорад. Оянда ҳамчунин кашидани хатти алоҳидаи роҳи оҳан ба масофаи 30 километр дар назар аст.

Ҳамчунин, барои бинокорон хобгоҳ, ошхона ва дигар шароити зарурии корӣ фароҳам оварда шудааст.

Ҷиҳати иҷрои босамари корҳо, аз ҷониби корхона зиёда аз 200 техникаву таҷҳизоти пуриқтидори калон харидорӣ шуда, ба таври шабонарузӣ фаъолият доранд.

Пешвои миллат муҳтарам Эмомалӣ Раҳмон зимни шиносоӣ аз ҷараёни корҳо дар корхона ба Вазорати саноат ва технологияҳои нав, «Комбинати металлургии тоҷик» ва дигар муассисаҳои масъул барои иҷрои саривақтии корҳои сохтмонӣ дар иншооти мазкур ва ҷиҳати то истеҳсоли маҳсулоти ниҳоӣ расонидани он супоришҳои мушаххас доданд.

Гузоштани санги асоси Корхонаи ғанигардонии маъдани оҳани ҶСП «Комбинати металлургии Тоҷик» дар ноҳияи Бобоҷон Ғафуров 01.04.2025

Апрель 1, 2025 14:01

Хабарҳои дигари ин бахш

Мубодилаи барқияҳои табрикии Президенти Ҷумҳурии Тоҷикистон Эмомалӣ Раҳмон ва Амири Давлати Кувайт Шайх Мишъал ал-Аҳмад ал-Ҷобир ас-Сабоҳ
Президенти Ҷумҳурии Тоҷикистон Эмомалӣ Раҳмон бо Раиси Ҷумҳурии Исломии Эрон Масъуди Пизишкиён суҳбати телефонӣ анҷом доданд
Сарвари давлат Эмомалӣ Раҳмон бо фаъолони соҳаи саноати вилояти Суғд мулоқот намуданд
Маросими гусели сарони давлатҳои Қирғизистон ва Узбекистон
Иштироки сарони давлатҳои Тоҷикистон, Қирғизистон ва Узбекистон дар барномаи фарҳангии муштараки наврӯзӣ
Суханронии Президенти Ҷумҳурии Тоҷикистон Эмомалӣ Раҳмон дар Барномаи фарҳангӣ ба ифтихори ҷашни байналмилалии Наврӯз
Боздиди сарони давлатҳои Тоҷикистон, Қирғизистон ва Узбекистон аз маҷмааи Қалъаи Хуҷанд
Бинои Маркази таъминоти бехатарии озуқаворӣ дар шаҳри Конибодом навсозӣ мегардад
Маросими имзои Шартнома миёни Ҷумҳурии Тоҷикистон, Ҷумҳурии Қирғизистон ва Ҷумҳурии Узбекистон дар бораи нуқтаи пайвастшавии сарҳадҳои давлатии се кишвар
Мулоқоти сеҷонибаи сарони давлатҳои Тоҷикистон, Қирғизистон ва Узбекистон
Маросими имзои Протоколи мубодилаи Тасдиқномаҳои Аҳднома миёни Ҷумҳурии Тоҷикистон ва Ҷумҳурии Узбекистон дар бораи муносибатҳои ҳампаймонӣ
Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Узбекистон Шавкат Мирзиёев мулоқот намуданд