Тарбияи ватандӯстии шаҳрвандон василаи таҳкими давлатдории миллӣ ва пешгирӣ аз экстремизму терроризм аст

ДУШАНБЕ, 08.04.2025 /АМИТ «Ховар»/. 7 апрел дар Донишгоҳи давлатии молия ва иқтисоди Тоҷикистон таҳти унвони «Тарбияи ватандӯстии шаҳрвандон-василаи таҳкими давлатдории миллӣ, пешгирӣ аз исрофкорӣ, экстремизм ва терроризм» ҳамоиш баргузор шуд, хабар доданд ба АМИТ «Ховар» аз ин донишгоҳ.

Иброз шуд, ки яке аз масъалаҳои калидие, ки имрӯзҳо меҳвари фаъолияти ниҳодҳои иҷтимоиву идеологии давлатию ҷамъиятиро дар бар мегирад, мавзуи тарбияи ватандӯстии шаҳрвандон ба шумор меравад. Ҳукумати Тоҷикистон барои тақвияти чораҳо дар ин самт барномаҳои гуногун қабул намуда, мавриди татбиқ қарор додааст.

Барои Тоҷикистони мустақил масъалаи тарбияи ватандӯстии шаҳрвандон ва ташаккули ҷаҳонбинии илмии ҷомеа масъулияти калидитарин дониста мешавад. Зеро бо баланд бардоштани ҷаҳонбинии донишиву илмии ҷомеа шароите муҳайё мегардад, ки шаҳрвандон дар амалисозии ҳадафҳои созандаву бунёдкоронаи давлату ҳукумати мамлакат мустақилонаю самаранок саҳм мегузоранд.

Дар ҳамоиш дар мавзуъҳои «Тарбияи ватандӯстии шаҳрвандонро бо донишу илм ташаккул бояд дод», «Самаранокии тарбияи ватандӯстии шаҳрвандон- омили самараноке дар самти пешгирии исрофкориву хурофоткорӣ», «Тарбияи ватандӯстии ҷомеа- унсури асосии пешгирии экстремизм ва терроризм», «Ташаккулёбии ҷаҳонбинии инноватсионии ҷавонон ва асосҳои рушди тарбияи ватандӯстии онҳо» ва «Ҷаҳонбинии илмии ҷавононро бояд густариш дод» маърузаҳо пешниҳод гардида, паҳлуҳои мухталифи мавзуъҳо шарҳу тавзеҳ дода шуданд.

Иброз гардид, ки  имрӯз зарурати ҷиддие пеш омадааст, ки бояд масъалаи ташаккули неруи зеҳнии ҷомеа, махсусан насли наврасу ҷавонро ташаккул дода, неруҳои инноватсионию технологӣ ба таври густурда инкишоф дода шаванд.

АКС: Донишгоҳи давлатии молия ва иқтисоди Тоҷикистон