Тоҷикистон мизбони бозиҳои интихобии Ҷоми Осиё-2026 байни духтарон (U-20) интихоб шуд

ДУШАНБЕ, 28.04.2025 /АМИТ «Ховар»/. Конфедератсияи футболи Осиё мизбонони марҳилаи интихобии Ҷоми Осиё-2026 байни духтарони то 20-соларо тасдиқ намуд, хабар медиҳад АМИТ «Ховар» бо истинод ба Федератсияи футболи Тоҷикистон.

Бозиҳои даври интихобӣ дар ҳашт мамлакат:  Тоҷикистон, Чин, Малайзия, Узбекистон, Ветнам, Мянмар, Лаос ва Бутан баргузор мешаванд.

Дар марҳилаи интихобии Ҷоми Осиё-2026 34 даста иштирок менамояд. Аз рӯйи натиҷаи қуръакашӣ ҳашт гурӯҳ ташкил карда мешавад: ду гурӯҳ аз панҷ дастаӣ ва шаш гурӯҳ аз чаҳор дастаӣ иборат хоҳанд буд. Ғолибони гурӯҳ ва се дастаи беҳтарини зинаи дуюм ба даври ниҳоии Ҷоми Осиё-2026 роҳхат мегиранд.

Мусобиқаи интихобии Ҷоми Осиё-2026 байни дастаҳои духтаронаи то 20-сола аз 2 то 10 августи соли равон доир мешавад. Рақибони дастаи духтаронаи Тоҷикистон дар гурӯҳ 28 апрел муайян карда мешаванд.

АКС: Федератсияи футболи Тоҷикистон