Ҳамоиши ҷумҳуриявии волонтёрон — «Пайравони Пешвои миллатем» баргузор гардид

ДУШАНБЕ, 03.05.2025. /АМИТ «Ховар»/. Дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба ифтихори оғози моҳвораи ҷавонон бо фарогирии 240 нафар фаъолҷавонони мамлакат таҳти унвони «Пайравони Пешвои миллатем» ҳамоиши ҷумҳуриявии волонтёрон баргузор гардид.

Ҳадафи баргузории ҳамоиш баланд бардоштани нақши волонтёрон дар ҷомеа, тақвияти ҳисси ватандӯстӣ ва ҳимоят аз ташаббусҳои созандаи Пешвои миллат муҳтарам Эмомалӣ Раҳмон мебошад.

Зимни ҳамоиш аз таҷрибаи муваффақи волонтёрон дар самти корҳои ҷамъиятӣ, ҳифзи муҳити зист ва ҳамдастӣ дар татбиқи  лоиҳаҳои иҷтимоӣ ёдовар шуданд.

Ҳамзамон маҳфилҳои доимамалкунандаи назди Кумита муаррифӣ карда шуда, волонтёрон ба фаъолияти ин маҳфилҳо ҷалб карда шуданд. Ин иқдом бо мақсади фаъолгардонии бештари ҷавонон дар самтҳои илм, фарҳанг, варзиш ва иҷтимоиёт амалӣ гардид.

Ҳамоиши ҷумҳуриявии волонтёрон бори дигар собит намуд, ки ҷавонони мамлакат ҳамчун пайравони асили Пешвои миллат барои ободию пешрафти Ватан омода буда, бо нерую ғайрати ҷавонмардона дар хизмати ҷомеа қарор доранд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон