Ҷавонон дар баргузории Конфронси байналмилалии сатҳи баланд оид ба ҳифзи пиряхҳо чӣ гуна саҳм мегузоранд?

ДУШАНБЕ, 20.05.2025. /АМИТ «Ховар»/.  Дар доираи Конфронси байналмилалии сатҳи баланд оид ба ҳифзи пиряхҳо  баргузории чорабиниҳои зиёди  канорӣ ба нақша гирифта шудааст, ки масъули онҳо вазорату идораҳои дахлдори мамлакат мебошанд. Кумитаи кор бо ҷавонон ва варзиши назди Ҳукумати Ҷумҳурии Тоҷикистон аз ҷумлаи ин сохторҳо мебошад, ки баргузории  Форуми ҷавонон ва наврасонро ба уҳда дорад. Хабарнигори АМИТ «Ховар»  дар ин мавзуъ   бо сардори шуъбаи муносибатҳои байналмилалии ин кумита Хусрав Аюбов суҳбат намуд.

АМИТ «Ховар»: Тавре маълум аст, моҳи май дар Тоҷикистон Конфронси байналмилалӣ оид ба ҳифзи пиряхҳо баргузор мешавад. Кумитаи кор бо ҷавонон ва варзиш дар ташкили ин конфронс чӣ уҳдадориҳо дорад?

 Хусрав Аюбов:  Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар баргузории Конфронси байналмилалӣ оид ба ҳифзи пиряхҳо фаъолона иштирок менамояд. Кумита дар доираи салоҳият баргузории Анҷумани ҷавонон, таъсиси корпуси волонтёрӣ, ҷалби васеи ҷавонону наврасон ба муҳокимаи масъалаҳои марбут ба тағйирёбии иқлим ва ҳифзи муҳити зистро ба уҳда дорад.  Мо инчунин дастгирии иттилоотиро ба ҷавонон ва дастгирии муколама байни насли ҷавон ва ҷомеаи коршиносонро пешниҳод менамоем.

АМИТ «Ховар»: Дар  доираи конфронс Форуми ҷавонон ва наврасон баргузор мешавад. Дар ин ҳамоиш иштироки чанд нафар ҷавонону наврасон дар назар аст? Ба он кадом муассисаҳои таълимӣ ҷалб карда мешаванд ва иштироки онҳо дар муҳокимаҳо оид ба ҳифзи пиряхҳо ва тағйирёбии иқлим чӣ гуна таъмин мешавад?

Хусрав Аюбов:  Дар назар аст, ки дар он беш аз 300 нафар ҷавонону наврасон аз тамоми манотиқи мамлакат ва меҳмонони хориҷӣ иштирок намоянд.

Дар форум намояндагони донишгоҳҳо, литсейҳо, коллеҷҳо ва мактабҳо, пеш аз ҳама, волонтёрон ва экологҳои фаъол иштирок менамоянд.

Барои ҷалби онҳо мо бо иштироки олимон, коршиносон ва шарикони байналмилалӣ мубоҳисаҳои интерактивӣ, ҷаласаҳои панелӣ, тренингҳо ва дарсҳои маҳорат ташкил менамоем. Барои муколамаи фаъол шароит фароҳам оварда мешавад, то ҳар иштироккунанда тавонад андешаи худро баён кунад ва дар таҳияи пешниҳодҳои ҷавонон саҳм гузорад.

АМИТ «Ховар»: Волонтёрон дар ин конфронс дар ташкили чорабиниҳо чӣ гуна иштирок менамоянд?

Хусрав Аюбов:  Иштироки волонтёрон дар ҳамаи марҳилаҳои конфронс таъмин карда мешавад. Зиёда аз 120 волонтёри омӯзишдида ба таъминоти моддӣ, бақайдгирӣ, ҳамроҳӣ кардани ҳайатҳо, тарҷума, инчунин баргузории чорабиниҳои канорӣ барои ҷавонон ва чорабиниҳои фарҳангӣ ҷалб карда мешаванд.

Тайёр кардани онҳо дар ҳамкории зич бо ташкилоти мо ва муассисаҳои таълимӣ амалӣ карда мешавад. Ихтиёриёни кумита бо либоси ягона таъмин карда мешаванд. Волонтёрон на танҳо ёрдамчиён, балки иштирокчиёни фаъоле мебошанд, ки қисми муколамаи муҳими байналмилалӣ мегарданд.

АМИТ «Ховар»: Мақсад аз ҷалби ҷавонон ба ҳифзи пиряхҳо ва масъалаи тағйирёбии иқлим чист? Оё имрӯз барои ҳалли ин масъала аз ҷониби ҷавонон ягон ташаббус пешниҳод мешавад?

Хусрав Аюбов:  Ҳадаф- ташаккул додани маърифати экологӣ дар байни насли наврас ва нишон додани аҳамияти нақши он дар ҳифзи мероси табиии мамлакат мебошад.

Ҷавонони Тоҷикистон дар ин самт аллакай фаъолияти баланд нишон медиҳанд: ташаббусҳои ҷавонон оид ба тоза кардани рӯдхонаҳо, ниҳолшинонӣ, гузаронидани машварату ҳашарҳои экологӣ ва марафон аз ин ҷумла мебошанд. Ҳамзамон аз ҷониби ҷавонон нисбат ба ташаббусҳои рақамӣ: эҷоди видеоҳои маърифатии экологӣ, маъракаҳои онлайн ва инфографика оид ба таъсири тағйирёбии иқлим таваҷҷуҳи махсус зоҳир карда мешавад.

АМИТ «Ховар»: Кумитаи кор бо ҷавонон ва варзиш   дар амалинамоии  ташаббусҳои Президенти Тоҷикистон оид ба ҳифзи пиряхҳо ва тағйирёбии иқлим кадом тадбирҳоро андешидааст?

Хусрав Аюбов:  Кумита сиёсатеро, ки дар суханронӣ ва ташаббусҳои Президенти Тоҷикистон баён гардидаанд, бахусус Ташаббуси глобалӣ оид ба ҳифзи пиряхҳоро фаъолона амалӣ менамояд.

Мо ҳамасола чорабиниҳои экологӣ, лагерҳои таълимӣ, озмунҳо ва конфронсҳои мавзуӣ ташкил менамоем, ки дар онҳо ҷавонон метавонанд дониши худро дар бораи тағйирёбии иқлим амиқтар намоянд. Барои марказҳои ҷавонон ва маҳфилҳо низ адабиёти таълимию методӣ нашр карда мешавад.

АМИТ «Ховар»: Кумитаи кор бо ҷавонон ва варзиш кадом лоиҳаҳо ё ташаббусҳои экологиро барои ҳифзи пиряхҳо амалӣ менамояд? Иштироки ҷавонон дар чунин лоиҳаҳо дар кадом сатҳ аст?

Хусрав Аюбов:  Кумита дар якҷоягӣ бо шарикони байналмилалӣ ва миллӣ якчанд лоиҳаҳоро амалӣ менамояд: масалан, барномаи «Ҷавонон барои табиати пок», Рӯзҳои миллии ҳаракати экологӣ, инчунин лоиҳаи «Инкишофи илми ҷавонон дар соҳаи иқлимшиносӣ».

Шумо метавонед тавассути созмонҳои ҷавонон, иттиҳодияҳои ихтиёрӣ, эко-маҳфилҳо ва пешниҳоди дархостҳои ташаббускорона дар озмунҳои кушоде, ки мо мунтазам баргузор мекунем, иштирок намоед.

АМИТ «Ховар»: Оё конфронс мундариҷаи махсуси таълимиро барои ҷавонон бобати баланд бардоштани огоҳии онҳо дар бораи таъсири тағйирёбии иқлим ба пиряхҳо ва экосистемаҳо фаро мегирад?

Хусрав Аюбов:  Бале, барномаи махсуси таълимӣ қисми ҷудонашавандаи форуми ҷавонон аст. Он маърузаҳои коршиносон, муаррифиҳои илмии оммавӣ, филмҳои ҳуҷҷатӣ ва намоишгоҳҳоро дар бар мегирад, ки ба тағйирёбии иқлим бахшида шудаанд. Дар ин раванд баргузории викторинаҳои илмӣ, шабҳои саволу ҷавоб бо олимону экологҳо низ ба нақша гирифта шудааст.

АМИТ «Ховар»: Оё гузаронидани чорабиниҳои муштарак бо ташкилоти экологӣ ва илмӣ, ки ба омӯзиши ҳолати пиряхҳо ва дарёфти роҳи ҳалли ҳифзи онҳо нигаронида шудаанд, дар назар аст? Чӣ тавр ҷавононро ба ин пажӯҳишҳо ва ташаббусҳо ҷалб кардан мумкин аст?

Хусрав Аюбов:  Бале, дар доираи анҷуман ва пас аз анҷоми он тасмим гирифтаем, ки як силсила чорабиниҳои муштаракро бо Академияи миллии илмҳои Тоҷикистон, Кумитаи ҳифзи муҳити зист ва шарикони байналмилалӣ амалӣ намоем. Ҷалби ҷавонон тавассути иштирок дар экспедитсияҳо, таҳқиқоти саҳроӣ, лоиҳаҳои мактабӣ ва донишҷӯён ба даст оварда мешавад.

Мо мақсад дорем, ки илмро ба насли наврас наздиктар кунем ва нишон диҳем, ки ҳама метавонанд дар ҳифзи пиряхҳо саҳм гузоранд — хоҳ тавассути таҳқиқот, санъат ё технология. Инчунин таъкид кардан мехоҳем, ки дар назди Кумитаи кор бо ҷавонон ва варзиш Шабакаи ҷавонон оид ба захираҳои об ва иқлим таъсис дода шудааст. Ҳадафи ин шабака муттаҳид кардани ҷавонони фаъоле мебошад, ки ба ҳалли мушкилоти экологӣ ва иқлимӣ, бахусус идоракунии устувори об ва ҳифзи пиряхҳо таваҷҷуҳ доранд.

Шабака ташаббусҳои ҷавонон, аз ҷумла лоиҳаҳои таълимӣ ва илмиро амалӣ менамояд ва дар платформаҳои миллӣ ва байналмилалӣ бахшида ба дипломатияи об ва иқлим иштирок мекунад. Он ба сифати платформаи табодули дониш, амалҳои муштарак, таҳқиқот ва муколама байни ҷавонон, коршиносон ва сохторҳои давлатӣ хизмат менамояд.

Зарангези ЛАТИФ,
АМИТ «Ховар»

АКС: АМИТ «Ховар»