Бахшида ба «Шоҳнома»-и Абулқосим Фирдавсӣ ва 700-солагии Ҳофизи Шерозӣ намоиши асарҳо ифтитоҳ гардид

ДУШАНБЕ, 05.05.2025 /АМИТ «Ховар»/. 3 май дар Осорхонаи миллии Тоҷикистон ба ифтихори бузургдошти шоҳасари безаволи адабиёти тоҷику форс «Шоҳнома»-и Абулқосим Фирдавсӣ ва 700-солагии шоири ғазалсарои тоҷик Ҳофизи Шерозӣ намоиши асарҳои рассом–миниатурнигор, омӯзгори Донишкадаи давлатии санъати тасвирӣ ва дизайни Тоҷикистон Олим Камолзода ифтитоҳ гардид.

Тавре ба АМИТ «Ховар» аз ин донишкада хабар доданд, дар намоиш 50 миниатюраи гуногуни муаллиф, хусусан силсилаҳо аз саҳифаҳои рангини «Шоҳнома»-и Абулқосим Фирдавсӣ ва офаридаҳои мусаввир хос ба эҷодиёти пурғановати Ҳофизи Шерозӣ, ки дар солҳои мухталиф тасвир шудаанд, ба намоиш гузошта шуданд.

Намоиш на танҳо арҷгузорӣ ба шоҳасар ва шоири шаҳири адабиёти тоҷику форс, балки саҳми арзандае дар ҳифз ва рушди суннатҳои миллии рассомии Тоҷикистон ба шумор меравад.

Намоиш то 25 май идома ёфта, дӯстдорони санъату ҳунар имкон доранд бо асарҳои рассом шинос шаванд.

Зимни ифтитоҳи намоиш иброз гардид, ки Олим Камолзода ҳамчун аввалин миниатурнигор дар Тоҷикистон ба рушди ин равияи санъат муваффақ шудааст. Ӯ зимни машғулият бисёр мекӯшад, ки шогирдонаш аз нозукиҳо ва талаботи миниатурнигорӣ огоҳ бошанд ва ин жанрро дар ҷумҳурӣ пурра эҳё намуда, равнақ диҳанд.

 АКС: Донишкадаи давлатии санъати тасвирӣ ва дизайни Тоҷикистон