Дар ҷаласаи Шурои роҳбарони мақомоти гумрук дурнамои Созмони ҳамкории иқтисодӣ рӯнамоӣ гардид
ДУШАНБЕ, 29.05.2025 /АМИТ «Ховар»/. 28 май дар шаҳри Теҳрони Ҷумҳурии Исломии Эрон ҷаласаи 10-уми Шурои роҳбарони мақомоти гумруки давлатҳои аъзои Созмони ҳамкории иқтисодӣ баргузор шуд, ки дар он ҳайати Ҷумҳурии Тоҷикистон таҳти роҳбарии Сардори Хадамоти гумруки назди Ҳукумати Ҷумҳурии Тоҷикистон Хуршед Каримзода иштирок намуд.
Тавре ба АМИТ «Ховар» аз Хадамоти гумруки назди Ҳукумати Ҷумҳурии Тоҷикистон хабар доданд, дар ҷаласа фаъолияти кумитаҳои Созмони ҳамкории иқтисодӣ ва дастовардҳои ҷаласаи 9-уми Шуро, ки 20 июли соли 2023 дар шаҳри Бокуи Ҷумҳурии Озарбойҷон баргузор шуд, мавриди таҳлил ва натиҷагирӣ қарор гирифтанд.
Масъалаҳои мубрами соҳа, аз ҷумла рақамисозии минбаъдаи равандҳои гумрукӣ, такмили расмиёти транзитӣ, рушди низоми минтақавии мубодилаи маълумоти электронӣ (ММЭ) ва таҳкими ҳамкории гумрукӣ байни давлатҳои аъзо зимни ҷаласа баррасӣ шуданд.
Сардори Хадамоти гумруки назди Ҳукумати Ҷумҳурии Тоҷикистон Хуршед Каримзода ба зарурати тавсеаи ҳамкорӣ барои пешбурди фаъолияти гумрукӣ дар минтақаи Созмони ҳамкории иқтисодӣ таъкид намуд.
Дар ҳошияи ҳамоиш котиботи Созмони ҳамкории иқтисодӣ ҳуҷҷати муҳими стратегӣ — «Дурнамои Созмони ҳамкории иқтисодӣ барои солҳои 2026–2035»-ро рӯнамоӣ намуд. Ҳадафи он муосиркунонӣ ва рақамикунонии фаъолияти гумрукӣ бо фарогирии ҳамаи 10 давлати аъзо мебошад.
Ҳамзамон дар самти таҳкими иқтидори кадрии мақомоти гумруки давлатҳои аъзо таъкид гардид, ки ҳамкорӣ бо созмонҳои байналмилалӣ, аз ҷумла Созмони ҷаҳонии гумрук, Агентии Ҷопон оид ба ҳамкории байналмилалӣ (JICA) ва дигар шарикони рушд бояд густариш ёбад.
Дар фарҷоми ҷаласа иштирокчиён «Эъломияи Теҳрон»-ро қабул намуданд, ки чаҳорчӯбаи стратегии рушди тиҷорати минтақавӣ, таҳкими ҳамкории гумрукӣ ва пешбурди рақамисозии равандҳоро дар минтақаи Созмони ҳамкории иқтисодӣ фаро мегирад.
Ин Эъломия қадами муҳим дар роҳи навсозии амалияи гумрукӣ ва таҳкими ҳамгироии иқтисодӣ дар минтақа арзёбӣ гардид.
Бояд гуфт, ки Созмони ҳамкории иқтисодӣ ҳамчун минбари муҳими минтақавӣ нақши калидиро дар тақвияти равандҳои ҳамгироӣ, густариши ҳамкории тиҷоратию иқтисодӣ ва нақлиётӣ, хусусан дар самти ҳамкорӣ байни мақомоти гумруки давлатҳои аъзо иҷро менамояд.
АКС: Хадамоти гумруки назди Ҳукумати Ҷумҳурии Тоҷикистон
Дар Душанбе ҳамоиши сиёсӣ-фарҳангӣ таҳти унвони «Пешвои миллат — меъмори Ваҳдат» доир гардид
МЕГАФОН ТОҶИКИСТОН: Дар Санкт –Петербург Созишнома оид ба ҳамкории оператор бо таҳиягари пешбари Русия — Ivideon имзо гардид
Имрӯз дар шаҳри Душанбе ҳаво то 37 дараҷа гарм мешавад
Конфронси илмӣ-адабии «Душанбе — корзори ваҳдатофарӣ ва боргоҳи Ваҳдати миллӣ» баргузор шуд
Дар Вилояти Мухтори Кӯҳистони Бадахшон 9 иншооти саноатӣ ба истифода дода мешавад
Дар Бохтар вобаста ба пешгирии ғарқшавии ноболиғону ҷавонон ҳангоми оббозӣ вохӯрии иттилоотӣ доир шуд
Модарони ваҳдатсаро дар ноҳияҳои Исмоили Сомонӣ, Фирдавсӣ, Сино ва Шоҳмансури пойтахт бо сокинон вохӯрӣ мегузаронанд
АЗ БАРАКАТИ ВАҲДАТИ МИЛЛӢ. Дар ин муддат соҳаи саноат ва кӯҳкорӣ ба як бахши муҳими иқтисоди миллӣ табдил ёфт
«ХИЗМАТ БА ВАТАН ШАРАФ АСТ!». Дар ноҳияи Нуробод ҳамоиши хизматчиёни ҳарбӣ баргузор мешавад
Дар қаламрави Тоҷикистон заминларза ба амал омад
РӮЗИ БАЙНАЛМИЛАЛИИ ПИЁДАГАРДӢ. Ин намуди варзиш барои нигоҳ доштани вазни муътадили бадан кумак мекунад
Имрӯз дар ноҳияҳои алоҳидаи Тоҷикистон чангу ғубор ба амал меояд
