Дар Бадахшон 31-солагии таъсиси Қӯшунҳои сарҳадӣ таҷлил гардид

ДУШАНБЕ, 27.05.2025. /АМИТ «Ховар»/. Дар Театри вилоятии ба номи Меҳрубон Назарови шаҳри Хоруғи Вилояти Мухтори Кӯҳистони Бадахшон бахшида ба 31-солагии таъсиси Қӯшунҳои сарҳадии Кумитаи давлатии амнияти миллии Ҷумҳурии Тоҷикистон чорабинии тантанавӣ баргузор гардид. Дар ин хусус ба АМИТ «Ховар» аз мақомоти иҷроияи ҳокимияти давлатии  ин вилоят хабар доданд.

Иброз гардид, ки дар замони соҳибистиқлолии мамлакат маҳз бо заҳмату талошҳои Президенти Ҷумҳурии Тоҷикистон муҳтарам Эмомалӣ Раҳмон тамоми сохторҳои Қувваҳои Мусаллаҳи Ҷумҳурии Тоҷикистон таъсису ташаккул ёфта, шароити мусоид барои афсарону сарбозон фароҳам оварда шуд.

Таҳкурсии кадрии ин ниҳоди муҳофизи марзу буми мамлакат низ таҳким ёфта, дар сафи он ҳоло кадрҳои дорои дониши амиқи касбӣ ва таҷрибаи бойи роҳбарӣ содиқона хизмат менамоянд.

Метавон гуфт, ки афсарону сарбозони Қӯшунҳои сарҳадӣ бо малакаю маҳорат, кордонӣ ва нерумандию шуҷоати хеш аз шароити фароҳамовардаи Ҳукумати Ҷумҳурии Тоҷикистон истифода намуда, барои ҳимояи сарҳади давлатӣ ва ҳифзи манфиатҳои миллӣ далерона қарзи шаҳрвандиро иҷро менамоянд.

Давоми 31 соли фаъолияти кории ин ниҳоди муҳими давлат, ҳазорон нафар афсару сарбози Қӯшунҳои сарҳадӣ зимни адои вазифаи хизматӣ, яъне ҳифзу ҳимояи марзу буми Ватан, пешгирӣ намудани ҳама гуна амалҳои номатлуби хатарнок, аз қабили қочоқи маводи мухаддир, силоҳ, ғайриқонунӣ гузаштани сарҳад, ҳамчунин таъмини суботи ҷамъиятӣ, қаҳрамонию фидокории бемисл нишон доданд.

Таъкид шуд, ки ҷавонони баору номуси вилоят давоми чанд соли охир бо дарки баланди масъулият ва худшиносии миллӣ ҳурмату эҳтиром ба арзишҳои баланди ватанпарастӣ нахустин шуда, нақшаи даъват ба сафи Кувваҳои Мусаллаҳи Ҷумҳурии Тоқикистонро  таъмин менамоянд, ки  ин боиси ифтихори хурду бузурги вилоят мебошад.  Гузашта аз он бештари даъватшудагон ба таври ихтиёрӣ ба нуктаҳои хизмат  ҳозир шуда, имрӯзҳо беҳтарин сарбозони Қувваҳои Мусаллаҳ, Қувваҳои марзӣ ва ниҳодҳои дигари низомӣ арзёбӣ карда шуданд.

Боиси ифтихор ва сарфарозӣ аст ки имрӯзҳо ҳазорон фарзандони содиқи Ватан дар сафи Қӯшунҳои сарҳадӣ сарбаландона адои хизмат намуда, барои ҳифзи марзу буми Ватани азизамон сарбаландона масъулияти шаҳрвандиро иҷро   менамоянд.

Дар идомаи чорабинӣ дар вазъияти тантанавӣ  ба иддае аз афсарону сарбозон ва собиқадорони Қӯшунҳои сарҳадӣ рутбаҳои навбатӣ, медалҳои ҷашнӣ, ифтихорномаву  сипоснома ва ба собиқадорони ин соҳа туҳфаҳои арзишнок тақдим карда шуданд.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон