Дар Душанбе барои кормандони соҳаи сайёҳӣ даврҳои омӯзишӣ оғоз шуданд

ДУШАНБЕ, 22.05.2025. /АМИТ «Ховар»/. 21 май дар шаҳри Душанбе бо ибтикори Муассисаи давлатии «Маркази ҷумҳуриявии такмили ихтисоси кормандони соҳаҳои сайёҳӣ ва хизматрасонӣ»-и Донишгоҳи байналмилалии сайёҳӣ ва соҳибкории Тоҷикистон ва Корхонаи воҳиди давлатии «Маркази иттилоотии хизматрасониҳои сайёҳӣ»-и Кумитаи рушди сайёҳии назди Ҳукумати Ҷумҳурии Тоҷикистон ҳамоиши махсуси касбомӯзӣ баргузор гардид.

Тавре аз Донишгоҳи байналмилалии сайёҳӣ ва соҳибкории Тоҷикистон ба АМИТ «Ховар» хабар доданд, дар ҳамоиш беш аз 90 корманди соҳаи хизматрасонии сайёҳӣ, аз ҷумла намояндагони тарабхонаҳо, меҳмонхонаҳо ва роҳбаладони сайёҳӣ аз шаҳри Душанбе иштирок намуданд.

Даврҳои омӯзишӣ бо мақсади такмил додани донишу малакаи кормандони соҳа, баланд бардоштани сифати хизматрасонӣ ва амалисозии «Стратегияи рушди сайёҳӣ дар Ҷумҳурии Тоҷикистон барои давраи то соли 2030» гузаронида мешаванд.

Ин иқдом қадами муҳими амалисозии сиёсати давлатии соҳаи сайёҳӣ дар рушду тавсеаи устувори инфрасохтори сайёҳӣ дар мамлакат мебошад.

Даврҳои омӯзишӣ дар шакли назариявӣ ва амалӣ минбаъд дар дигар шаҳру ноҳияҳои ҷумҳурӣ баргузор карда мешаванд.

 АКС: Донишгоҳи байналмилалии сайёҳӣ ва соҳибкории Тоҷикистон