Дар Маркази стоматологии вилояти Хатлон ҷарроҳиҳои ҷоғу рӯй гузаронида мешаванд

 ДУШАНБЕ, 21.05.2025. /АМИТ «Ховар»/. Дар Маркази стоматологии вилояти Хатлон шуъбаи ҷарроҳии ҷоғу рӯй ба истифода дода шуд. Дар ин хусус АМИТ «Ховар» бо истинод ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иттилоъ медиҳад.

Шуъбаи ҷарроҳии ҷоғу рӯй бо таҷҳизоту дастгоҳҳои зарурӣ муҷаҳҳаз гардида, дорои 10 кат — 5 кат барои калонсолон ва 5 кат барои кӯдакон мебошад. Шуъба инчунин дорои ҳуҷраҳои ҷарроҳӣ, эҳёгарӣ ва бистарӣ буда, барои ташхису табобати беморон ҳамаи шароит фароҳам оварда шудааст.

Дар Маркази стоматологии вилояти Хатлон ҳама гуна ҷарроҳиҳои ҷоғу рӯй, аз ҷумла хейлоринопластика, уранопластика, ҷарроҳии гирифтани омосҳо, ҷарроҳии пластикию эстетикии рӯй ва ҷоғҳо, кушодани абсесҳо, флегментҳои қисми ҷоғу рӯй, пластикаи устухонҳо, остеосинтезҳои баъди шикастани устухонҳо ва ғайра анҷом дода мешаванд.

Таъсиси шуъбаи ҷарроҳии ҷоғу рӯй имкон медиҳад, ки ташхису табобат ва ҷарроҳии ҷоғу рӯй аз ин пас дар вилояти Хатлон беҳтар анҷом дода шавад.

Ёдовар мешавем, ки Маркази стоматологии вилояти Хатлон 27 октябри соли 2021 бо иштироки Президенти Ҷумҳурии Тоҷикистон муҳтарам Эмомалӣ Раҳмон мавриди истифода қарор гирифта буд.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон