Дар ноҳияи Ҷайҳун иқдоми экологӣ гузаронида шуд

ДУШАНБЕ, 20.05.2025 /АМИТ «Ховар»/. Таҳти унвони «Замини тоза» дар ноҳияи Ҷайҳуни вилояти Хатлон бо мусоидати Кумитаи ҳифзи муҳити зисти назди Ҳукумати Ҷумҳурии Тоҷикистон иқдоми васеи экологӣ баргузор гардид.

АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад, ки ҳадафи иқдом – нест кардани хатарнокии экологие аст, ки аз замони собиқ боқӣ монда, ба ҷамъшавии пеститсидҳо (моддаҳои химиявӣ) ва моддаҳои устувори органикии ифлоскунанда марбут аст. Иҷрокунандаи корҳо ташкилоти ҷамъиятии «Пешсаф» мебошад, ки корҳои поксозии мавзеъро мутобиқ ба меъёрҳои ҷаҳонии экологӣ ба иҷро мерасонад.

Лоиҳа бо дастгирии Бунёди глобалии экологӣ (ГЭФ) ва Ташкилоти озуқаворӣ ва кишоварзии Созмони Милали Муттаҳид (FAO) дар доираи Барномаи «Идоракунии давраи ҳаётии пеститсидҳо ва безараргардонии моддаҳои устувори органикӣ (СОЗ) дар кишварҳои Осиёи Марказӣ ва Туркия» амалӣ карда мешавад.

То имрӯз зиёда аз 4500 тонна хоки омехта ба пеститсид ва беш аз 20 тонна пеститсидҳои «тоза» аз минтақа хориҷ карда шудаанд. Мушкилоти асосӣ дар хориҷсозии пеститсидҳои кӯҳнашуда мебошад, ки даҳсолаҳо дар замин то чуқурии 2 метр ҷойгир буданд.

Ҳамаи партовҳои хатарнок муваққатан дар анбори махсуси Полигони Вахш нигоҳ дошта шуда, ба талаботи муосири амнияти экологӣ ҷавобгӯ мебошанд. Ғайр аз корҳои поксозӣ мутахассисони Кумита дар байни аҳолии маҳаллӣ корҳои фаҳмондадиҳӣ мегузаронанд. Онҳо дар бораи хатари ифлосшавии кимиёвӣ суҳбат намуда, усулҳои бехатари кишоварзиро меомӯзонанд ва сокинонро ба назорат ва арзёбии вазъи экологӣ ҷалб менамоянд.

Чунин ташаббусҳо дар беҳтарсозии вазъи экологии минтақа ва таъмини амнияти аҳолӣ нақши калидӣ доранд.

Кумитаи ҳифзи муҳити зисти назди Ҳукумати Ҷумҳурии Тоҷикистон чунин чорабиниҳоро дар дигар минтақаҳои ҷумҳурӣ, ки дар он ҷойҳо низ зарурати нест кардани оқибатҳои истифодаи шадиди пеститсидҳо боқӣ мондааст, доир менамояд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон