Дар шаҳри Душанбе Фестивали футбол ва шоми ҷавонӣ баргузор гардид

ДУШАНБЕ, 24.05.2025. /АМИТ «Ховар»/. 24 май бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Мақомоти иҷроияи ҳокимияти давлатии шаҳри Душанбе, бахшида ба Рӯзи ҷавонони Тоҷикистон ва Рӯзи ҷаҳонии футбол дар «Майдони 800-солагии Москва»-и назди Театри давлатии академии Опера ва балети ба номи Садриддин Айнӣ Фестивали футбол ва шоми ҷавонӣ баргузор гардид. Дар ин хусус ба АМИТ «Ховар» аз Кумитаи кор бо ҷавонон ва варзиш хабар доданд.

    Чорабинӣ бо мақсади таҳкими ваҳдату дӯстӣ байни ҷавонон, тарғиби тарзи ҳаёти солим ва арҷгузорӣ ба арзишҳои миллӣ роҳандозӣ шуда, дар он садҳо нафар ҷавонон, варзишгарон, намояндагони сохторҳои давлатӣ, ташкилотҳои ҷамъиятӣ ва меҳмонони хориҷӣ иштирок намуданд.

Дар чорабинии бошукӯҳи фарҳангӣ дар баробари сокинони пойтахти кишвар инчунин ҳайати иштирокчиёни Форуми ҷавонони кишварҳои Осиёи Марказӣ ва кишварҳои Шурои ҳамкории Халиҷ низ иштирок намуда, ба фазои фарҳангии мамлакат баҳои баланд доданд.

Дар аз оғози қисми расмии чорабинӣ намоишгоҳ бо намоиши бозиҳои интерактивӣ ва варзишии миллӣ, фестивали футбол бо мусобиқа ва бозиҳои дӯстона миёни дастаҳои ҷавонон, гӯшаҳои ҳунарҳои мардумӣ ва инноватсионӣ бо ҷалби ширкатҳои ватанӣ ба намоиш гузошта шуд.

Дар бахши расмии чорабинӣ роҳбарияти Кумитаи кор бо ҷавонон ва варзиши мамлакат ва Мақомоти иҷроияи ҳокимияти давлатии шаҳри Душанбе суханронӣ намуда, ҷавононро ба созандагиву худшиносӣ ва саҳмгузорӣ дар пешрафти ҷомеа даъват карданд.

Дар қисми фарҳангии чорабинӣ аз ҷониби сарояндагони машҳури эстрадаи тоҷик суруду таронаҳои ҷолиб ва барномаи рангини консерти пешкаши тамошобинон ва ҷавонон гардид. Ин барномаи консертӣ фазои чорабиниро гарму мунаввар гардонида, руҳияи иштирокчиёнро болидаву идона намуд.

Чорабинӣ саҳнаи ҳамбастагии ҷавонон, рушди иқтидорҳои эҷодӣ ва талошҳои пайвастаи онҳо барои ободии Ватан гардид.

АКС: Кумитаи кор бо ҷавонон ва варзиши назди Ҳукумати Ҷумхҳурии Тоҷикистон