Дар Тоҷикистон бахшида ба Рӯзи ҷаҳонии футбол ҳафтаи футбол ба таври бошукуҳ таҷлил карда мешавад

ДУШАНБЕ, 12.05.2025 /АМИТ «Ховар»/. Дар доираи таҷлили Рӯзи ҷаҳонии футбол аз 19 то 25 май дар саросари Тоҷикистон  чорабиниҳои муҳим дар самти оммавӣ гардонидани футбол, таҳкими нақши он дар ҷомеа ва тарғиби тарзи ҳаёти солим ба нақша гирифта шудаанд.

Тавре ба АМИТ «Ховар» аз Федератсияи футболи Тоҷикистон хабар доданд, ба барномаи ҳафтаи футбол, ки ба Рӯзи ҷаҳонии футбол бахшида шудааст, якчанд  чорабинӣ дохил карда шудааст:

-зиёда аз 25 фестивали футбол барои кӯдакон дар тамоми минтақаҳои мамлакат;

-бозии ситораҳои футболи Тоҷикистон ва Русия;

-рақобат барои Суперҷоми Тоҷикистон-2025 байни дастаҳои «Истиқлол»-и Душанбе ва «Регар-ТадАЗ»-и Турсунзода;

-бозиҳои силсилаи ниҳоии Суперлигаи футзали Тоҷикистон-2025;

-оғози мавсими нави Лигаи футболи бонувони Тоҷикистон;

-мусобиқаҳои кӯдакону наврасон дар минтақаҳои ҷумҳурӣ;

-мастер-классҳо бо иштироки бозигарони дастаҳои мунтахаби Тоҷикистон;

-мусобиқаҳо байни ташкилот.

Федератсияи футболи Тоҷикистон тамоми ҳаводорони варзиш, ҷавонон, мураббиён, мутахассисон ва мухлисонро даъват менамояд, ки дар таҷлили  Рӯзи ҷаҳонии футбол иштирок намуда, дар рушди фарҳанги футболи мамлакат саҳм гузоранд.

 АКС: Федератсияи футболи Тоҷикистон