Кумита оид ба таҳсилоти ибтидоӣ ва миёнаи касбии Тоҷикистон ва Институти ҷумҳуриявии таҳсилоти касбии Беларус ҳамкориро тақвият мебахшанд

ДУШАНБЕ, 27.05.2025 /АМИТ «Ховар»/. 26 май дар шаҳри Мински Ҷумҳурии Беларус байни Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон ва Институти ҷумҳуриявии таҳсилоти касбии назди Вазорати маорифи Ҷумҳурии Беларус Созишнома оид ба ҳамкорӣ ва фаъолияти муштарак ба имзо расид. Дар ин хусус ба АМИТ «Ховар» аз Кумита оид ба таҳсилоти ибтидоӣ ва миёнаи касбӣ хабар доданд.

Созишномаро Раиси Кумита оид ба таҳсилоти ибтидоӣ ва миёнаи касбӣ Фарҳод Раҳимӣ ва Ректори Институти ҷумҳуриявии таҳсилоти касбӣ Валерий Голубовский ба имзо расониданд.

Дар асоси санади имзошуда ҳамкорӣ байни муассисаҳои таҳсилоти ибтидоӣ ва миёнаи касбии Тоҷикистон ва муассисаҳои таълимии Беларус, ки барномаҳои таълимии таҳсилоти касбӣ-техникӣ доранд, рушд намуда, табодули таҷриба ва иштирок дар конфронсу ҳамоишҳои илмии ҷониби якдигар амалӣ мегарданд.

Аз ҷониби Фарҳод Раҳимӣ таъкид шуд, ки соҳаи таҳсилоти касбӣ дар Ҷумҳурии Тоҷикистон чун самти меҳварии фаъолият зери таваҷҷуҳи махсуси давлату Ҳукумат қарор дорад. Доир ба таҳияи маводи муосири таълимӣ, истифодаи босамари технологияҳои рақамӣ, усулҳои нави омӯзиши забонҳои хориҷӣ, такмили маҳорати касбии омӯзгорон дар дохилу хориҷ, бунёди муассисаҳои нави таълимӣ, таҳсили донишҷӯёни тоҷик дар муассисаҳои хориҷӣ ва дигар ҷанбаҳои фаъолият пайваста тадбирҳо андешида мешаванд. Ҳамкорӣ бо шарикони рушд ва ниҳодҳои илмии байналмилалӣ дар ин самт ба манфиати ҷонибҳо мебошад.

АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон