Мусобиқаи ҷумҳуриявии футболи хурд барои дарёфти «Ҷоми Ҳизби Халқии Демократии Тоҷикистон» баргузор шуд

ДУШАНБЕ, 24.05.2025. /АМИТ «Ховар»/. Дар доираи таҷлили Рӯзи ҷавонон ва Рӯзи ҷаҳонии футбол дар шаҳри Душанбе Мусобиқаи ҷумҳуриявии футболи хурд барои дарёфти «Ҷоми Ҳизби Халқии Демократии Тоҷикистон» доир гардид. Дар ин хусус ба АМИТ «Ховар» аз Кумитаи иҷроияи ҳизб хабар доданд.

Иброз гардид, ки Ҳизби Халқии Демократии Тоҷикистон барои ҷавонон тавассути оммавигардонии варзиш, таблиғи тарзи ҳаёти солим, омода намудани варзишгарони касбӣ, аз ҷумла ҳама навъҳои варзишҳои олимпӣ аз тамоми имкониятҳои мавҷуда истифода мебарад. Инчунин барои ҷалби ҳарчи бештари ҷавонон ба мусобиқаҳои варзишӣ диққати аввалиндараҷа дода шуда, тавассути воситаҳои ахбори омма тарғиби варзиш ва тарзи ҳаёти солимро васеъ амалӣ менамояд.

Ҳизби Халқии Демократии Тоҷикистон варзишро ҳамчун яке аз омилҳои муассири тарбия ва муаррифии шоистаи мамлакат дар арсаи байналмилалӣ эътироф намуда,  ҷавононро  даъват менамояд, ки ба ин навъи варзиш бештар машғул шуда, аз имконоти фароҳамовардашуда самаранок истифода намоянд.

АКС: Кумитаи иҷроияи Ҳизби Халқии Демократии Тоҷикистон