ОГОҲӢ. Дар Тоҷикистон то 17 май ҳарорати ҳаво баланд мешавад

ДУШАНБЕ, 14.05.2025. /АМИТ «Ховар»/. Аз 15 то 17 май дар мамлакат ҳарорати ҳаво баланд мешавад. Барои ин давраи моҳи май чунин ҳавои баланд ғайримуқаррарӣ аст. Дар ин хусус АМИТ «Ховар» бо истинод ба Агентии обуҳавошиносии мамлакат хабар медиҳад.

15-17 май дар водиҳои вилояти Хатлон, ноҳияҳои тобеи ҷумҳурӣ ва вилояти Суғд ҳаво аз 34+39 то 37+42 дараҷа гарм пешгӯӣ карда мешавад.

Инчунин аз 17 то 19 май дар баъзе шаҳру ноҳияҳои ҷумҳурӣ бо сабаби воридшавии тӯфони чангу ғубор аз минтақаҳои ҷанубу ғарб ва шимолу ғарб баландшавии ифлосшавии ҳавои атмосферӣ аз заррачаҳои андозаашон 10 Мкр ва 2,5 Мкр (PM 10, PM 2,5) дар назар аст.

17 ва 19 май рӯзона дар ноҳияҳои вилояти Хатлон, хусусан дар ноҳияҳои ҷанубӣ ва марказӣ чангу ғубор дар назар аст. 18-19 май дар ноҳияҳои тобеи ҷумҳурӣ, шаҳри Душанбе ва шаҳру ноҳияҳои вилояти Суғд чангу ғубор пешгӯӣ карда мешавад.

Ба шаҳрвандон тавсия дода мешавад, ки дар ин рӯзҳо аз соати 11:00 то 16:00 дар кӯча сайругаштро кам намоянд. Нӯшидани таоми моеъ ва об, нӯшокиҳои мевагӣ ва афшура тавсия дода мешавад. Аз нӯшидани нӯшокиҳои ширин ва спиртӣ бояд худдорӣ намуд.

Ба мактаббачагон тавсия дода мешавад, ки барои мутобиқ шудан ба чунин шароит барвақт ба мактаб ҳозир шаванд ва давоми рӯз оби кофӣ нӯшанд. Ҳангоми пайдо шудани нишонаҳо, ба монанди чарх задани сар, сустӣ ё аз ҳад зиёд гарм шудан ба духтур муроҷиат кунед.

Аз шаҳрвандон хоҳиш карда мешавад, ки ҳангоми тибқи зарурат ба берун баромадан аз воситаҳои муҳофизатӣ ва ниқобҳо истифода намоянд. Ба кӯдакон ва пиронсолон, ки ба ифлосшавии ҳаво ҳассостаранд, бояд диққати махсус дода шавад.

АКС: АМИТ «Ховар»