Сафири Тоҷикистон бо Мудири иҷроияи Бонки исломии Абузабӣ мулоқот намуд

ДУШАНБЕ, 20.05.2025 /АМИТ «Ховар»/. Дар шаҳри Абузабӣ мулоқоти Сафири Фавқулода ва Мухтори Ҷумҳурии Тоҷикистон дар Амороти Муттаҳидаи Араб Ашрафҷон Гулов бо Мудири иҷроияи Бонки исломии Абузабӣ Муҳаммад Абдулборӣ баргузор гардид.

Тавре ба АМИТ «Ховар» аз Сафорати Ҷумҳурии Тоҷикистон дар Амороти Муттаҳидаи Араб хабар доданд, дар вохӯрӣ ҷонибҳо аҳаммияти тавсеаи ҳамкорӣ байни бонкҳои Ҷумҳурии Тоҷикистон ва Бонки исломии Абузабиро ба мақсади рушди равобити иқтисодию молиявӣ таъкид намуданд.

Ҳамчунин ҳамсуҳбатон омӯзиши имконоти шарикӣ дар низоми бонкдорӣ, тавсеаи муносибатҳои муросилотӣ, мутобиқсозии фаъолияти бонкӣ бо меъёрҳои байналмилалӣ, табодули таҷриба дар самти беҳсозии хизматрасониҳои бонкӣ барои мизоҷон бо истифода аз технологияҳои рақамӣ, зарфиятсозӣ ва ташкили сафарҳои омӯзишии кормандон ба кишварҳои ҳамдигарро муҳим арзёбӣ намуданд.

АКС: Сафорати Ҷумҳурии Тоҷикистон дар Амороти Муттаҳидаи Араб