Самтҳои муҳим ва афзалиятноки ҳамкории Бонки миллии Тоҷикистон бо Бонки ҷаҳонӣ баррасӣ гардид

ДУШАНБЕ, 29.05.2025 /АМИТ «Ховар»/. Раванди татбиқи лоиҳаҳо, самтҳои муҳимми ҳамкорӣ, аз ҷумла рушди фарогирии молиявӣ ва иқтисоди ғайринақдӣ, инчунин омӯзиши самтҳои нави шарикӣ барои дастгирии мақсадҳои рушди иҷтимоию иқтисодии мамлакат дар мулоқоти Раиси Бонки миллии Тоҷикистон Фирдавс Толибзода бо директори минтақавии кишварҳои Аврупо ва Осиёи Марказӣ оид ба масъалаҳои рушди одилонаи молия ва муассисоти Бонки ҷаҳонӣ Асад Алам дар шаҳри Душанбе баррасӣ гардид.

АМИТ «Ховар» бо истинод ба Бонки миллии Тоҷикистон иттилоъ медиҳад, ки зимни мулоқот доир ба лоиҳаҳои рушди бахши молиявӣ ва хусусӣ, дастгирии сиёсати рушд ва таҳкими бахши молиявӣ дар Тоҷикистон табодули назар карда шуд.

Таъкид шуд, ки лоиҳаҳои мазкур муваффақона амалӣ гардида, дар доираи татбиқи матритсаи ислоҳот тадбирҳои зарурӣ оид ба зиёд намудани самаранокии бахши молиявӣ ва дастрасӣ ба хизматрасонии молиявӣ татбиқ карда шуданд. Ҳоло дар доираи марҳилаи 2-юми лоиҳаи «Таҳкими бахши молиявӣ дар Тоҷикистон» ва лоиҳаи «Рушди бахши молиявӣ ва хусусӣ» корҳои муайян идома доранд.

Раиси Бонки миллии Тоҷикистон дар робита ба фарогирии молиявӣ дар мамлакат изҳор дошт, ки низоми бонкӣ бо мақсади густариши пардохтҳои ғайринақдӣ, рушди инфрасохтори рақамӣ, амалӣ намудани технологияҳои инноватсионӣ ва беҳтар намудани хизматрасонии молиявӣ тадбирҳои зарурӣ андешида, ташкилоти қарзии молиявӣ феълан технологияҳои муосири хизматрасониҳои бонкии фосилавӣ, аз қабили кортҳои пардохтии бонкӣ, ҳамёнҳои электронӣ, бонкдории мобилӣ, интернет-банкинг, пардохт тавассути POS-терминалҳо ва QR-рамзҳоро мавриди истифода қарор додаанд.

Дар мулоқот масъалаҳо оид ба самтҳои нави шарикӣ дар бахши суғурта, тағйирёбии иқлим ва баробарии гендерӣ низ баррасӣ шуданд.

Дар маҷмуъ, ҷонибҳо барои идома додани ҳамкорӣ изҳори омодагӣ намуданд.

АКС: Бонки миллии Тоҷикистон