Сатҳи татбиқи технологияҳои иттилоотӣ дар муассисаҳои миёнаи умумии вилояти Хатлон таҳлил карда мешавад

ДУШАНБЕ, 15.05.2025. /АМИТ «Ховар»/. Аз 14 то 26 май гурӯҳи кории Маркази ҷумҳуриявии технологияи информатсионӣ ва коммуникатсия якчанд муассисаҳои таҳсилоти умумии шаҳру ноҳияҳои вилояти Хатлонро мавриди омӯзиш ва таҳлил қарор медиҳад. Дар ин хусус ба АМИТ «Ховар» аз маркази матбуоти Вазорати маориф ва илми Ҷумҳурии Тоҷикистон хабар доданд.

Гурӯҳи корӣ бо мақсади таҳлили раванди татбиқи «Барномаи ҷорӣ намудани технологияҳои иттилоотӣ ва коммуникатсионӣ дар муассисаҳои таҳсилоти умумии Ҷумҳурии Тоҷикистон барои солҳои 2024–2028» ба вилояти Хатлон равона гардида, вазъи кунунӣ ва сатҳи татбиқи технологияҳои иттилоотӣ-коммуникатсионӣ дар ин муассисаҳоро мавриди омӯзиш ва таҳлил қарор медиҳад.

Гурӯҳи корӣ истифодаи таҷҳизоти компютерӣ, пайвастшавӣ ба шабакаи интернет, фаъолияти синфхонаҳо, истифодаи интернет дар равандҳои таълимӣ ва сатҳи рақамикунонии муҳити таълимиро мавриди санҷиш қарор медиҳад.

Ҳадаф аз санҷиш тақвияти заминаҳои техникию иттилоотии муассисаҳои таҳсилоти умумӣ, рушди инфрасохтори рақамӣ ва баланд бардоштани самаранокии истифодаи технологияҳои муосир дар соҳаи маориф мебошад.

Марказ итминон дорад, ки татбиқи мунтазами барнома ба густариши имконияти рақамӣ дар муассисаҳои таҳсилоти миёнаи умумӣ мусоидат намуда, шароити омӯзишро дар муассисаҳои таълимии мамлакат беҳтар менамояд.

АКС: Маркази матбуоти Вазорати маориф ва илми Ҷумҳурии Тоҷикистон