Сулаймон Зиёзода: «Тоҷикистон аввалин давлатест, ки дар Осиёи Марказӣ феҳристи хатари иқлимиро барои кӯдакон амалӣ менамояд»
ДУШАНБЕ, 29.05.2025. /АМИТ «Хвар»/. Тоҷикистон кайҳо боз таъсири афзояндаи тағйирёбии иқлимро ба ҷомеаҳои осебпазир, бахусус кӯдакон эътироф намудааст. Бо ин мақсад мо моҳи майи соли 2024 Эъломия оид ба фаъолияти кӯдакон, ҷавонон ва иқлимро имзо кардем. Тоҷикистон давлати сеюм дар Осиёи Марказӣ ва яке аз 40 давлати ҷаҳон мебошад, ки ин уҳдадориҳои таърихиро ҷонибдорӣ намудааст. Чунин иброз намуд муовини Сарвазири Ҷумҳурии Тоҷикистон Сулаймон Зиёзода имрӯз зимни баргузории Форуми кӯдакон ва ҷавонон бахшида ба ҳифзи пиряхҳо (Тавонмандсозии насли оянда: садоҳо барои ҳифзи пиряхҳо ва иқдоми иқлимӣ), ки дар доираи Конфронси байналмилалии сатҳи баланд оид ба ҳифзи пиряхҳо дар шаҳри Душанбе баргузор гардид.
Муовини Сарвазири Тоҷикистон изҳор дошт, ки Конфронси байналмилалии сатҳи баланд оид ба ҳифзи пиряхҳо тибқи қатъномаи Маҷмаи Умумии Созмони Милали Муттаҳид, ки 14 декабри соли 2022 қабул шуда, соли 2025-ро Соли байналмилалии ҳифзи пиряхҳо эълон намуд, баргузор карда мешавад. Ин ташаббуси муҳим уҳдадории моро ба баланд бардоштани сатҳи огоҳӣ ва густариши ҳамкории байналмилалӣ барои ҳалли таъсири обшавии босуръати пиряхҳо ба захираҳои об, ки ба кӯдакон ва ҷавонони тамоми ҷаҳон таъсири бештар мерасонад, таъкид менамояд.
«Мехоҳам таъкид намоям, ки Тоҷикистон аввалин давлате дар Осиёи Марказӣ аст, ки Феҳристи хатари иқлимӣ барои кӯдакон — модели хатари офатҳоро амалӣ менамояд. Он маълумоти муҳимро дар бораи хатарҳои мушаххасе, ки кӯдакони мо дар иқлими тағйирёбанда дучор меоянд, таъмин мекунад ва бобати қабули қарорҳои ҳассос барои кӯдакон ҷиҳати омодагӣ ба ҳолати фавқулода, вокуниш ва чораҳои мутобиқшавӣ метавонад истифода шавад», -иброз дошт муовини Сарвазири мамлакат.
Изҳор гардид, ки ҷавонон на танҳо ворисони фардо, балки шарикони фаъоли имрӯз ҳастанд, ки неру, тафаккури навоварона ва хоҳиши воқеии тағйирот доранд.
Форуми имрӯзаи кӯдакону ҷавонон оид ба ҳифзи пиряхҳо барои ҷавонон минбари муҳими баррасии масъалаи муҳимтарини ҳифзи пиряхҳо мегардад. Он ба ҷавонони Тоҷикистон ва дигар кишварҳо имкон медиҳад, ки идеяҳо ва роҳҳои ҳалли инноватсионӣ оид ба ҳифзи захираҳои пиряхҳои муҳими моро мубодила намоянд.
«Инчунин бо дастгирии Кумитаи ҳифзи муҳити зист ҷавонон ба лоиҳаҳои марбут ба ҷангалсозӣ, ҳифзи об ва ҳифзи гуногунии биологӣ машғул шудаанд. Мо ба наздикӣ як барномаи панҷсолаи «Барномаи давлатии маҷмуии рушди тарбия ва маърифати экологии аҳолии Ҷумҳурии Тоҷикистон»-ро оғоз хоҳем кард, ки саводнокии экологӣ ва идоракунии масъулиятшиносиро дар байни кӯдакону ҷавонон тарбия мекунад», -таъкид намуд Сулаймон Зиёзода.
Муовини Сарвазири ҷумҳурӣ афзуд, ки пешниҳоди муштараки лоиҳавӣ байни ЮНИСЕФ ва Маркази татбиқи лоиҳаҳои сармоягузории Кумитаи ҳифзи муҳити зистро барои пешниҳод ба Хазинаи Иқлими Сабз таҳия менамоем. Ҳадафи ин пешниҳод баланд бардоштани устувории иқлими муассисаҳои таълимӣ, донишҷӯён ва ҷамоатҳои маҳаллӣ дар Тоҷикистон тавассути таҷдиди энергияи каммасраф дар мактабҳо, таъмини инфрасохтори иқлими Об, беҳдошт ва санитария ва насби технологияҳои муосири гармидиҳӣ, ки тавассути ҳамгироии энергияи Офтоб дастгирӣ мешавад, хоҳад буд. Мо бо ЮНИСЕФ ҳамкорӣ менамоем, то маълумот оид ба тағйирёбии иқлим барои ҳамаи кӯдакон дастрас бошад ва муҳити омӯзишӣ аз ҷиҳати иқлим оқилона ва бехатар бошад.
Зарангези ЛАТИФ,
АМИТ «Ховар»
АКС: АМИТ «Ховар»
Президенти Ҷумҳурии Тоҷикистон Эмомалӣ Раҳмон директори иҷроияи Бунёди иқлими сабз Мафалда Дуартеро ба ҳузур пазируфтанд
Сарвари давлат Эмомалӣ Раҳмон Директори генералии ИСЕСКО Салим ал-Моликро ба ҳузур пазируфтанд
Дар доираи Ҳафтаи кӯдакон ва наврасони шаҳри Душанбе дар Боғи кӯдакон барномаи бошукуҳи фарҳангӣ доир мешавад
Пешвои миллат Эмомалӣ Раҳмон муовини Раиси Шурои машваратии сиёсии мардумии Чин, Раиси Кумитаи СҲШ оид ба ҳамсоягии нек, дӯстӣ ва ҳамкорӣ Шэн Юэюэро ба ҳузур пазируфтанд
Пешвои миллат: «Давлатҳо ва созмонҳои байлналмилалиро зарур аст барои ҳифзи пиряхҳо саҳми молиявии бештар гузоранд»
Шаҳбоз Шариф: «Тағйироти иқлим марзро намешиносад ва вокунишҳо ба он набояд бо марз маҳдуд бошанд»
Ноиби Президенти Бонки Осиёии рушд: «Мо дар ҳалли мушкилоти обшавии пиряхҳо ва ҳифзи захираҳои обӣ кумак менамоем»
Эмомалӣ Раҳмон: «Дар Тоҷикистон Озмоишгоҳи минтақавии яхшиносӣ таъсис дода шавад»
Президенти Ҷумҳурии Тоҷикистон Эмомалӣ Раҳмон дар нахустин Конфронси байналмилалии сатҳи баланд оид ба ҳифзи пиряхҳо иштирок намуданд
Дар Маркази саломатии шаҳрии №15-и шаҳри Душанбе шуъбаи дастгирии ҳамаҷонибаи оила ва кӯдак ифтитоҳ шуд
Президенти Тоҷикистон: «Соли 2023 бузургтарин коҳиши солонаи ҳаҷми пиряхҳо ба қайд гирифта шуда, дар натиҷа 600 гигатонна оби ошомиданӣ талаф ёфт»
Президенти Тоҷикистон: «Обшавии босуръати пиряхҳо ба истеҳсоли неруи барқи тоза таъсири манфӣ мерасонад»
