Дар истироҳатгоҳи «Ширкент» зиёда аз 1300 нафар кӯдакону наврасон истироҳат менамоянд

Июнь 30, 2025 17:41

ТУРСУНЗОДА, 30.06.2025 /АМИТ «Ховар»/. Дар басти якуми истироҳатгоҳи «Ширкент»-и шаҳри Турсунзода зиёда аз 420 нафар кӯдакону наврасон ба истироҳату фароғат фаро гирифта шуданд. Дар басти аввал аз шаҳру ноҳияҳои  вилояти Хатлон, Душанбе, Турсунзода ва дигар манотиқи ҷумҳурӣ ва як қисми таълимгирандагони ятиму маъюби Мактаб-интернатҳои ҷумҳуриявии ноҳияи Шаҳринаву шаҳри Душанбе  истироҳат намуда истодаанд,  хабар медиҳад мухбири минтақавии АМИТ «Ховар».

Директори мавсимии истироҳатгоҳи «Ширкент» Ҷалол Холов иброз дошт, ки «истироҳатгоҳ дар як баст то 450 нафар кӯдакро ба истироҳат фаро гирифта метавонад. Аз ин рӯ,  дар ҳамкорӣ бо иттифоқҳои касабаи сохторҳои гуногуни ҷумҳурӣ имсол дар чор баст зиёда аз 1300 нафар кӯдакону наврасон дар ин истироҳатгоҳи хушбоду ҳаво истироҳат менамоянд».

Директори Ҷамъияти саҳомии кушодаи «Хизматрасонии сайёҳӣ»-и Ҷамъияти саҳомии кушодаи «Ширкати алюминийи Тоҷик» Шамшод Фозилзода гуфт, ки дар партави дастуру супоришҳои Пешвои миллат муҳтарам Эмомалӣ Раҳмон ҷиҳати дар сатҳи баланд гузаронидани истироҳати кӯдакону наврасон имсол дар истироҳатгоҳи «Ширкент» тамоми шароити заруриро муҳайё намудем.

«Қабл аз ҳама, корҳои таъмир, муҷаҳҳазгардонии биноҳо, майдончаҳои варзишӣ ва ҳавзҳои шиноварӣ ба анҷом расонида шуда, ба меъёрҳои муқаррарнамудаи мақомоти ваколатдори назорати давлатии санитарию эпидемиологӣ ва бехатарӣ аз сӯхтор ҷавобгӯ мебошанд. Ғамхорӣ нисбат ба қишрҳои ниёзманди аҳолӣ, бахусус кӯдакон ва наврасон яке аз масъалаҳои асосии сиёсати иҷтимоии Президенти мамлакат муҳтарам Эмомалӣ Раҳмон маҳсуб меёбад. Дар се басти истироҳатгоҳ зиёда аз 500 нафар кӯдакони ятими кул, нимятим ва хонандагони мактаб-интернатҳои ҷумҳуриявӣ кӯдакон аз оилаҳои камбизоат ба истироҳат фаро гирифта мешаванд»,-афзуд номбурда.

Истироҳатгоҳ «Ширкент» бо кадрҳои омӯзгорӣ таъмин буда, чорабиниҳои таълимию тарбиявӣ ва варзишҳои пагоҳирӯзӣ ҳамарӯза дар сатҳи баланд ташкил карда мешаванд. Ин ҷо ҳолати санитарию гигиенӣ пайваста зери назорати мутахассисон қарор дорад. Наврасон баробари фароғату истироҳат дар ин ҷо бо табиати бою рангини Тоҷикистон шинос шуда, дар сайру гашт ва экскурсияҳо иштирок мекунанд. Дар истироҳатгоҳ хондани суруд, рақсидан, хондани китобҳои бадеӣ ва омӯзиши забонҳои хориҷӣ аз ҷумлаи машғулиятҳое мебошад, ки барои кӯдакон писанд аст. Ҳамчунин дар истироҳатггоҳ нуқтаи тиббӣ мавҷуд аст, ки дар он табиб  ба кӯдакону наврасон ба таври шабонарӯзӣ хизмати тиббӣ мерасонад.

Мурабияи  истироҳатгоҳи «Ширкент» Аниса Ҳотамова гуфт, ки айни замон дар гурӯҳи ман 19 нафар кӯдакони ятими Мактаб-интернати ҷумҳуриявӣ аз шаҳри Душанбе ба истироҳати тобистона фаро гирифта шудаанд. Дар истироҳатгоҳи  «Ширкент» беҳтарин шароит мавҷуд аст, ки аз ин имконияҳо кӯдакон истифода намуда, истироҳати бофароғат доранд.

Субҳониддини МАҲМУД,
АМИТ «Ховар»

АКС: АМИТ «Ховар»

Июнь 30, 2025 17:41

Хабарҳои дигари ин бахш

Дар Душанбе Намоишгоҳи байналмилалии «TajBUILD-2025» баргузор мегардад
Раҳматҷон Раҳматов: «МегаФон Тоҷикистон – танҳо оператори телекоммуникатсионӣ нест»
Имрӯз дар шаҳри Душанбе ҳаво то 32 дараҷа гарм мешавад
Муассисаи Кумаки аввалияи тиббию санитарии шаҳри Кӯлоб ба давраи тирамоҳу зимистон омода мебошад
Дар ноҳияи Зафаробод 7 корхонаи қабулу коркарди пахта фаъолият менамоянд
ОЁ МЕДОНЕД? Истеъмоли ангур барои гирифторони иллатҳои дилу гурда ва шуш бештар судманд аст
Имрӯз дар доманакӯҳҳои Тоҷикистон ҳаво то 28 дараҷа гарм мешавад
Имконоти сайёҳии Тоҷикистон дар Форуми байналмилалии сайёҳии Манғистав муаррифӣ гардид
МегаФон Тоҷикистон туҳфаҳои аввалини иқдоми «МегаМиллион»-ро тақдим намуд
Имрӯз дар Тоҷикистон раъду барқ ба амал меояд
Орзуи миллионер шудан бо ZET-MOBILE воқеъист
1 октябр ҷаласаи Шурои Маҷлиси миллии Маҷлиси Олии Ҷумҳурии Тоҷикистон баргузор мешавад